آزاد کشمیر اور گلگت بلتستان میں ڈیجیٹل کنیکٹیوٹی کی جانب اہم سنگ میل

آزاد جموں و کشمیر اور گلگت بلتستان کے دشوار گزار اور دور دراز علاقوں کو عالمی ڈیجیٹل نقشے پر لانے کے لیے ایک بڑے منصوبے کا آغاز کر دیا گیا ہے۔ اسپیشل کمیونیکیشن آرگنائزیشن (SCO) کے تحت جاری اس مشن کا مقصد دونوں خطوں میں 4G سروسز کی فراہمی اور نیٹ ورک کو جدید خطوط پر استوار کرنا ہے۔ اس منصوبے کے تحت مجموعی طور پر 47 نئے 4G ٹاورز نصب کیے جا رہے ہیں، جن میں سے 11 ٹاورز کی تنصیب کا عمل مکمل ہو چکا ہے، جبکہ 87 میں سے 53 پرانی سائٹس کو اپ گریڈ کر کے وہاں تیز ترین انٹرنیٹ کی سہولت فراہم کر دی گئی ہے۔

حکام کے مطابق، کنیکٹیویٹی کے اس وسیع منصوبے کو دسمبر 2026 تک مکمل کرنے کا ہدف مقرر کیا گیا ہے، جس سے نہ صرف مواصلاتی نظام بہتر ہوگا بلکہ پسماندہ علاقوں میں آن لائن تعلیم، ای کامرس اور روزگار کے نئے دروازے بھی کھلیں گے۔ اسپیشل کمیونیکیشن آرگنائزیشن نے اپنے عزم کا اعادہ کیا ہے کہ وہ ‘ڈیجیٹل پاکستان’ کے وژن کے تحت ان پہاڑی علاقوں کے عوام کو وہ تمام جدید سہولیات فراہم کرے گی جو بڑے شہروں کو میسر ہیں۔