شدید بارشوں کے باعث کیٹ فش پانی سے نکل کر زمین پر آگئیں

شدید بارشوں اور سیلابی صورتحال کے دوران قدرت کا ایک نہایت ہی حیرت انگیز اور انوکھا منظر سامنے آیا ہے، جہاں پانی میں رہنے والی مچھلیاں (کیٹ فش) اچانک خشکی پر نکل آئیں اور زمین پر رینگتی ہوئی دکھائی دیں۔

سوشل میڈیا پر وائرل ہونے والی ایک ویڈیو میں دیکھا جا سکتا ہے کہ موسلادھار بارش کے بعد یہ مچھلیاں پانی چھوڑ کر سڑکوں اور زمین پر کسی ماہر پیراک کی طرح بل کھاتی ہوئی آگے بڑھ رہی ہیں۔ یہ منظر اس قدر غیر معمولی تھا کہ دیکھنے والے دنگ رہ گئے؛ کچھ مچھلیاں نہایت سکون سے چلتی رہیں جبکہ کچھ نے اتنی تیزی دکھائی کہ انٹرنیٹ صارفین نے اسے مذاقاً مچھلیوں کی ‘میراٹھن’ قرار دے دیا۔

سوشل میڈیا پر اس حوالے سے دلچسپ تبصروں کا سلسلہ جاری ہے، جہاں صارفین نے اسے قدرت کا کرشمہ قرار دیا وہیں کچھ نے مزاحیہ انداز میں کہا کہ شاید مچھلیاں پانی کی بھیڑ سے تنگ آکر سیر سپاٹے کے لیے باہر نکل آئی ہیں۔ یہ ویڈیو جہاں خوف اور حیرت کا باعث بنی، وہی اپنی نوعیت کے منفرد واقعے کی وجہ سے سب کی توجہ کا مرکز بنی ہوئی ہے۔