نیویارک جانے والی پرواز میں بچے کی پیدائش، شہریت کے حوالے سے دلچسپ صورتحال پیدا ہوگئی

جمیکا سے نیویارک جانے والی کیریبین ایئرلائنز کی پرواز اس وقت خبروں کی زینت بن گئی جب دورانِ سفر طیارے میں ایک ننھے مسافر کا اضافہ ہو گیا۔ 4 اپریل کو کنگسٹن سے روانہ ہونے والی اس پرواز میں ایک خاتون نے بحفاظت بچے کو جنم دیا، جس کے بعد ایئرپورٹ پر طبی ٹیم نے ماں اور بچے کو فوری نگہداشت فراہم کی۔ اگرچہ ایئرلائن نے بچے کی جنس ظاہر نہیں کی، تاہم پائلٹ اور ایئر ٹریفک کنٹرولر کے درمیان ہونے والی گفتگو سے معلوم ہوا ہے کہ بچہ لڑکا ہے اور اس کا نام ‘کینیڈی’ رکھا گیا ہے۔

اس دلچسپ واقعے نے نومولود کی شہریت کے حوالے سے ایک پیچیدہ قانونی بحث کو جنم دے دیا ہے۔ امریکی قوانین کے مطابق اگر کوئی بچہ امریکی فضائی حدود میں پیدا ہو تو وہ پیدائشی طور پر امریکی شہریت کا حقدار ہوتا ہے، تاہم موجودہ صورتحال میں یہ واضح نہیں کہ پیدائش کے وقت طیارہ کس مقام پر پرواز کر رہا تھا۔ مزید برآں، صدر ڈونلڈ ٹرمپ کے اس ایگزیکٹو آرڈر نے بھی معاملے کو الجھا دیا ہے جس کے تحت صرف امریکی شہریت رکھنے والے والدین کے بچوں کو ہی شہریت دینے کی بات کی گئی تھی، اگرچہ یہ آرڈر فی الحال وفاقی عدالت کی جانب سے بلاک ہے اور سپریم کورٹ میں زیرِ سماعت ہے۔ ایئرلائن حکام کا کہنا ہے کہ خاتون کی پرائیویسی کا مکمل احترام کیا جا رہا ہے اور شہریت کا فیصلہ متعلقہ دستاویزات اور پیدائش کے وقت طیارے کی درست لوکیشن کی بنیاد پر کیا جائے گا۔