90 سالہ معمر خاتون نے تقریباً 3 منٹ تک لٹک کر نیا ریکارڈ قائم کردیا

امریکی ریاست اوہائیو سے تعلق رکھنے والی 90 سالہ معمر ایتھلیٹ این کرائل ایسلسٹن نے ‘ڈیڈ ہینگ’ (Dead Hang) پوزیشن میں 2 منٹ 52 سیکنڈ تک رہ کر نیا گنیز ورلڈ ریکارڈ قائم کر دیا ہے۔ 10 مختلف کھیلوں میں بطور کھلاڑی اور کوچ مہارت رکھنے والی این کرائل نے رواں سال فروری میں اس چیلنج کے لیے باقاعدہ تربیت کا آغاز کیا اور 81 سالہ اینی جوڈس کا سابقہ ریکارڈ توڑ کر یہ اعزاز اپنے نام کیا۔ چار بچوں اور 10 پوتے پوتیوں کی دادی این کرائل نے اس تاریخی کامیابی پر خوشی کا اظہار کرتے ہوئے کہا کہ انہوں نے اپنی زندگی دوسروں کی کامیابیوں پر خوشیاں مناتے گزاری، لیکن 90 سال کی عمر میں خود ایک عالمی اعزاز حاصل کرنا ان کے لیے ایک حیران کن اور فخر کا لمحہ ہے۔ ان کی یہ ہمت اور جسمانی طاقت سوشل میڈیا پر لاکھوں افراد کے لیے فٹنس کی ایک نئی مثال بن گئی ہے۔