مس تھائی لینڈ کے مقابلہ حسن میں امیدوار کے نقلی دانت گرنے کی ویڈیو وائرل

بینکاک: تھائی لینڈ میں جاری ‘مس گرینڈ تھائی لینڈ’ کے مقابلے میں اس وقت ایک عجیب مگر دلچسپ صورتحال پیدا ہوگئی جب ایک نوجوان امیدوار کے نقلی دانت (وینیئرز) بھری محفل میں نکل آئے۔ 18 سالہ ماڈل کامولوان چناگو اسٹیج پر اپنی تعارفی تقریر کر رہی تھیں کہ اچانک ان کے دانتوں پر لگے وینیئرز ڈھیلے ہو کر باہر آگئے، جس کی ویڈیو سوشل میڈیا پر تیزی سے وائرل ہو رہی ہے۔

لائیو اسٹریمنگ کے دوران دیکھا جا سکتا ہے کہ کامولوان تقریر کے بیچ میں اچانک بولنے میں دشواری محسوس کرتی ہیں، تاہم انہوں نے کمالِ ہوشیاری سے کیمرے سے رخ موڑ کر فوری طور پر انہیں درست کیا۔ اس غیر متوقع حادثے نے ایک لمحے کے لیے حاضرین کو حیران کر دیا، لیکن ماڈل نے گھبرانے کے بجائے غیر معمولی پیشہ ورانہ مہارت (Professionalism) کا مظاہرہ کیا۔

اپنے نقلی دانتوں کو درست کرنے کے فوراً بعد کامولوان نے نہ صرف اپنی تقریر مکمل کی بلکہ پورے اعتماد کے ساتھ اسٹیج پر اپنی واک بھی پوری کی۔ ان کے اس پُراعتماد رویے اور صورتحال کو سنبھالنے کے انداز نے وہاں موجود ججز اور حاضرین کو بے حد متاثر کیا، جس پر پورا ہال تالیوں سے گونج اٹھا۔ سوشل میڈیا صارفین بھی ماڈل کی ہمت کی داد دے رہے ہیں کہ انہوں نے ایک ممکنہ شرمندگی والے لمحے کو اپنی جیت میں بدل دیا۔