بیلاروس کے صدر کا شمالی کوریا کا دورہ، کم جونگ اُن کو رائفل کا تحفہ

الیگزینڈر لوکاشینکو نے شمالی کوریا کے دورے کے دوران وہاں کے رہنما کم جونگ اُن سے اہم ملاقات کی، جس میں دوطرفہ تعلقات کے فروغ کے لیے معاہدے پر دستخط بھی کیے گئے۔

سربراہی ملاقات کے دوران بیلاروس کے صدر نے کم جونگ اُن کو ایک خودکار رائفل بطور تحفہ پیش کی۔ اس موقع پر انہوں نے مزاحیہ انداز میں کہا کہ یہ ہتھیار دشمن کے سامنے آنے کی صورت میں کارآمد ثابت ہوگا، جس پر شمالی کوریائی رہنما نے مسکراتے ہوئے ہتھیار کا معائنہ کیا اور اس کے ری لوڈنگ نظام کو بھی جانچا۔

غیر ملکی خبررساں اداروں کے مطابق یہ لوکاشینکو کا شمالی کوریا کا پہلا دورہ ہے، جو ان کی سفارتی حکمت عملی کا عکاس ہے۔ وہ ایک جانب روس کے اتحادی اور مغرب مخالف ممالک کے ساتھ تعلقات کو مضبوط کر رہے ہیں، جبکہ دوسری جانب امریکا کے ساتھ تعلقات میں بہتری کی کوششیں بھی جاری رکھے ہوئے ہیں۔

یہ دورہ ایک ایسے وقت میں سامنے آیا ہے جب حال ہی میں انہوں نے امریکی صدر کے ایلچی سے ملاقات کی اور بیلاروس کی جانب سے متعدد سیاسی قیدیوں کی رہائی بھی عمل میں لائی گئی، جسے پابندیوں میں ممکنہ نرمی سے جوڑا جا رہا ہے۔