تل ابیب پر اڑتے کووں کے جُھنڈ، کیا ’مکمل تباہی‘ کی علامت ہے؟

تل ابیب: اسرائیل کے دارالحکومت تل ابیب کے آسمان پر کوؤں کے ایک عظیم الشان جھنڈ کے منڈلانے کی ویڈیو نے سوشل میڈیا پر تہلکہ مچا دیا ہے۔ یہ ویڈیو ایک ایسے وقت میں وائرل ہوئی ہے جب خطہ شدید کشیدگی اور میزائل حملوں کی زد میں ہے، جس کے باعث انٹرنیٹ صارفین پرندوں کی اس غیر معمولی حرکت کو کسی بڑی ‘آنے والی تباہی’ یا ‘تباہی کے شگون’ (Harbinger of Doom) کے طور پر دیکھ رہے ہیں۔

سوشل میڈیا پلیٹ فارم ‘ایکس’ پر صارفین نے اس واقعے کو مختلف تاریخی اور مذہبی تناظر میں پیش کیا ہے۔ ایک صارف کے مطابق قدیم روم میں پرندوں کی ایسی حرکات کو ‘خدا کی ناراضگی’ اور ‘سلطنتوں کے زوال’ کی علامت سمجھا جاتا تھا، یہاں تک کہ رومی ایسی صورتحال میں جنگیں تک روک دیا کرتے تھے کیونکہ ان کا ماننا تھا کہ خدا نے اس زمین سے اپنی امان اٹھا لی ہے۔

مذہبی حلقوں میں بھی اس واقعے کو خاصی اہمیت دی جا رہی ہے۔ بعض صارفین نے انجیلِ مقدس کی ‘بک آف ریویلیشن’ (Book of Revelation) کا حوالہ دیتے ہوئے اسے مکمل تباہی کا پیش خیمہ قرار دیا ہے۔ ماہرینِ حیاتیات کا کہنا ہے کہ پرندوں کا یہ طرزِ عمل بعض اوقات موسمی تبدیلی یا ماحولیاتی دباؤ کا نتیجہ بھی ہو سکتا ہے، تاہم موجودہ جنگی صورتحال نے ان توہمات اور پیشگوئیوں کو نئی ہوا دے دی ہے۔