وفاقی آئینی عدالت کا تاریخی فیصلہ: کم عمری کی شادی پر سزا ہو سکتی ہے مگر نکاح ختم نہیں ہوگا،

اسلام آباد: وفاقی آئینی عدالت نے 18 سال سے کم عمر مسیحی لڑکیوں کی مسلمان لڑکوں سے شادی اور پسند کے نکاح کے حوالے سے ایک انتہائی اہم اور دور رس فیصلہ جاری کر دیا ہے۔ عدالت نے لاہور کی رہائشی ماریہ بی بی کے قبولِ اسلام اور شہریار نامی لڑکے سے نکاح کو قانونی طور پر درست تسلیم کرتے ہوئے اس کے والد کی جانب سے دائر کردہ حبسِ بے جا کی درخواست خارج کر دی ہے۔

عدالت نے اپنے فیصلے میں واضح کیا ہے کہ چائلڈ میرج ایکٹ 1929 کے تحت کم عمری کی شادی پر فوجداری سزا تو دی جا سکتی ہے، لیکن قانون میں کہیں بھی اس بنیاد پر نکاح ختم کرنے کا ذکر موجود نہیں ہے۔ فیصلے کے مطابق، مسلمان مرد شرعی طور پر ‘اہلِ کتاب’ خواتین کے ساتھ نکاح کرنے کے اہل ہیں، اور ماریہ بی بی کے معاملے میں اس کے قبولِ اسلام کا ڈیکلریشن پہلے سے موجود تھا۔

اس فیصلے کی ایک اہم ترین شق عدالتوں کے دائرہ اختیار سے متعلق ہے۔ وفاقی آئینی عدالت نے قرار دیا ہے کہ آئینی تشریح کے لیے حتمی فورم سپریم کورٹ نہیں بلکہ وفاقی آئینی عدالت ہی ہے، اور سپریم کورٹ سمیت تمام ماتحت عدالتیں آئینی عدالت کے احکامات ماننے کی پابند ہیں۔ عدالت نے مزید واضح کیا کہ وہ سپریم کورٹ کے وضع کردہ ان اصولوں یا نظیروں کو ماننے کی پابند نہیں جو آئین یا قانون سے متصادم ہوں۔