پاکستانی معمر شہری نے تیسرا ورلڈ ریکارڈ بنا کر دنیا کو حیران کردیا

کراچی: شہرِ قائد کے علاقے شاہ فیصل کالونی کے رہائشی 74 سالہ نسیم الدین نے پیرانہ سالی میں بھی ہمت اور طاقت کی نئی مثال قائم کرتے ہوئے اپنا تیسرا گنیز ورلڈ ریکارڈ (Guinness World Record) بنا لیا ہے۔ نسیم الدین نے اپنے ہاتھ میں ایک نازک انڈا پکڑ کر 38 ماربل ٹائلز توڑنے کا حیرت انگیز مظاہرہ کیا، جس سے انڈا بھی محفوظ رہا۔ اس سے قبل یہ عالمی ریکارڈ 30 ٹائلز توڑنے کا تھا۔

گنیز ورلڈ ریکارڈز کی انتظامیہ نے ای میل کے ذریعے اس نئے ریکارڈ کی باقاعدہ تصدیق کر دی ہے اور اسے اپنی ویب سائٹ پر بھی اپڈیٹ کر دیا ہے۔ واضح رہے کہ نسیم الدین اس سے قبل 163 اخروٹ توڑنے اور ایک ہاتھ سے سیب کچلنے کے عالمی ریکارڈ بھی اپنے نام کر چکے ہیں۔

نسیم الدین نے اپنی اس شاندار کامیابی کو پاک فوج کے نام کرتے ہوئے کہا کہ انہیں فخر ہے کہ وہ اس عمر میں بھی پاکستان کا سر فخر سے بلند کر رہے ہیں۔ دلچسپ بات یہ ہے کہ نسیم الدین کا پورا خاندان ہی ریکارڈ ساز ہے، جس میں ان کا بیٹا، بہو، پوتا اور پوتی بھی مختلف عالمی ریکارڈز اپنے نام کر چکے ہیں۔ انہوں نے پیغام دیا کہ وطن سے محبت اور محنت انسان کو کسی بھی عمر میں کامیاب بنا سکتی ہے۔