امریکا میں گمشدہ بلی 5 سال بعد اپنے مالکان سے جا ملی

میری لینڈ: ریاست میری لینڈ کے علاقے ہکوری میں ایک معجزاتی واقعہ پیش آیا ہے جہاں “آرٹیمس” نامی پالتو بلی ستمبر 2021 میں لاپتہ ہونے کے تقریباً ساڑھے چار سال بعد اپنے مالکان سے دوبارہ مل گئی۔ اس طویل جدائی کے بعد واپسی نے نہ صرف مالکان کو حیران کر دیا بلکہ پالتو جانوروں کی حفاظت کے لیے جدید ٹیکنالوجی کی اہمیت کو بھی ثابت کر دیا ہے۔

رپورٹ کے مطابق، آرٹیمس ستمبر 2021 میں گھر سے باہر نکلی اور پھر واپس نہ آئی۔ اس کے مالکان نے اسے تلاش کرنے کے لیے پمفلٹس تقسیم کیے اور مقامی سطح پر ہر ممکن کوشش کی، مگر کوئی سراغ نہ مل سکا۔ تاہم، فروری 2026 میں ایک خاتون کو یہ بلی ایک زیرِ تعمیر تہہ خانے سے ملی، جسے وہ ‘کرافورڈ کاؤنٹی ہیومین سوسائٹی’ کے مرکز لے آئیں۔

ہیومین سوسائٹی کے عملے نے جب بلی میں نصب مائیکرو چپ (Microchip) کو اسکین کیا، تو حیرت انگیز طور پر معلوم ہوا کہ یہ وہی گمشدہ “آرٹیمس” ہے۔ ادارے نے فوری طور پر مالکان سے رابطہ کیا، جن کے لیے یہ خبر کسی معجزے سے کم نہ تھی۔ مالکان کا کہنا ہے کہ آرٹیمس کو دیکھ کر ایسا لگا جیسے وہ کبھی گئی ہی نہیں تھی، یہ ان کی زندگی کا خوشگوار ترین لمحہ تھا۔ اگرچہ یہ معمہ اب بھی برقرار ہے کہ آرٹیمس اتنے سال کہاں رہی، لیکن اس واقعے نے یہ پیغام عام کر دیا ہے کہ پالتو جانوروں میں مائیکرو چپ لگوانا ان کی بحفاظت واپسی کا واحد اور بہترین ذریعہ ہے۔