8 سال تک حلق میں چوپ اسٹک پھنسا کر زندگی گزارنے والا شخص

بیجنگ: چین کے صوبے لیاؤننگ سے تعلق رکھنے والے ایک شخص ‘وانگ’ کی حیران کن کہانی نے انٹرنیٹ صارفین کو ورطہِ حیرت میں ڈال دیا ہے، جو گزشتہ 8 سال سے اپنے حلق میں 12 سینٹی میٹر لمبی دھاتی چوپ اسٹک پھنسائے زندگی گزار رہا تھا۔ یہ واقعہ 8 سال قبل کھانے کے دوران حادثاتی طور پر پیش آیا تھا، تاہم آپریشن کے خوف سے وانگ نے اسے نکلوانے سے انکار کر دیا تھا۔

وانگ کے مطابق، اس طویل عرصے کے دوران اسے کھانے پینے میں مشکلات تو پیش آتی تھیں مگر حال ہی میں تکلیف کی شدت ناقابلِ برداشت ہو گئی، جس کے بعد اس نے دوبارہ اسپتال کا رخ کیا۔ ڈاکٹروں نے معائنے کے دوران دریافت کیا کہ دھاتی چوپ اسٹک اب بھی حلق میں موجود ہے، تاہم خوش قسمتی سے اس نے اندرونی جھلی یا اعضا کو کوئی مستقل نقصان نہیں پہنچایا تھا۔

مریض کی خواہش پر ڈاکٹروں نے گلا کاٹنے کے بجائے منہ کے راستے سرجری کر کے کامیابی سے چوپ اسٹک نکال لی۔ وانگ اب تیزی سے صحتیاب ہو رہا ہے، مگر اس کی یہ عجیب و غریب کہانی سوشل میڈیا پر تیزی سے وائرل ہو رہی ہے جہاں لوگ اتنے طویل عرصے تک اس تکلیف کے ساتھ رہنے پر حیرانی کا اظہار کر رہے ہیں۔