سائنسدان نے گندھک اور میگما کے درمیان نیا سیارہ دریافت کر لیا

سائنسدانوں نے ایک منفرد اور حیرت انگیز سیارہ دریافت کر لیا ہے جس میں میگما کا دائمی سمندر موجود ہے اور اندر گندھک کے وافر ذخائر پائے جاتے ہیں۔ اس نئے سیارے کا نام L 98-59 d رکھا گیا ہے جو زمین سے تقریباً 35 نوری سال کے فاصلے پر ایک ستارے کے گرد گردش کر رہا ہے۔

یہ اہم دریافت جدید ترین خلائی دوربین جیمز ویب سپیس ٹیلیسکوپ کے ذریعے کیے گئے مشاہدات کے نتیجے میں سامنے آئی ہے۔ تحقیق کے مطابق یہ سیارہ زمین سے تقریباً 1.6 گنا بڑا ہے اور اس کی فضا میں ہائیڈروجن سلفائیڈ کی بڑی مقدار موجود ہے، جو گندھک سے بھرپور ماحول کی نشاندہی کرتی ہے۔

سائنسدانوں نے بتایا کہ اس سے قبل اس سیارے کے بارے میں مختلف قیاس آرائیاں تھیں، جیسے یہ ایک گیس ڈوارف ہو سکتا ہے یا برف اور گہرے سمندروں سے بھری پانی کی دنیا۔ تاہم تازہ ترین تحقیق نے یہ تمام قیاسات رد کرتے ہوئے انکشاف کیا کہ یہ سیارہ ایک بالکل نئی قسم کا ہے، جہاں گندھک کے بھاری مالیکیولز غالب ہیں اور سطح پر میگما کا سمندر مسلسل موجود رہتا ہے۔

ماہرین کا کہنا ہے کہ اس دریافت سے نہ صرف سیاروں کی اقسام کے بارے میں ہماری سمجھ بڑھے گی بلکہ یہ کائنات میں موجود عجیب و غریب دنیاؤں کے بارے میں مزید تحقیق کے دروازے بھی کھولے گی۔