عام درد کش ادویات کے استعمال سے متعلق خطرناک انکشاف

طبی ماہرین نے خبردار کیا ہے کہ سر درد، جوڑوں کے درد یا عام تکلیف کے لیے استعمال ہونے والی درد کش ادویات (Painkillers) کا ضرورت سے زیادہ استعمال گردوں کی کارکردگی کو مستقل طور پر متاثر کر سکتا ہے۔ ادارہ کڈنی کیئر یو کے اور نیشنل فارمیسی ایسوسی ایشن (NPA) کی جانب سے جاری کردہ رپورٹ میں کہا گیا ہے کہ لوگ اکثر معمولی درد کے لیے آئبوپروفین جیسی ادویات پر انحصار کرتے ہیں، جو طویل مدت میں گردوں کے لیے تباہ کن ثابت ہو سکتی ہیں۔
ماہرین کی تحقیق کے مطابق ان ادویات کے نقصانات درج ذیل صورتوں میں سامنے آتے ہیں:
خون کے بہاؤ میں کمی: نان اسٹرائیڈل اینٹی انفلیمیٹری ادویات (NSAIDs) جیسے کہ آئبوپروفین، نیپروکسین اور ڈائیکلوفیناک گردوں تک خون کی رسائی کو کم کر دیتی ہیں، جس سے ان کے بافتوں (Tissues) کو نقصان پہنچتا ہے۔
بلڈ پریشر میں اضافہ: یہ ادویات بلڈ پریشر بڑھانے کا سبب بنتی ہیں، جو براہِ راست گردوں کے اندر موجود باریک خون کی نالیوں کو نقصان پہنچاتا ہے۔
ہائی رسک گروپ: شوگر (ذیابیطس) اور ہائی بلڈ پریشر کے مریضوں کو ان ادویات کے استعمال میں انتہائی احتیاط برتنی چاہیے کیونکہ ان کے گردے پہلے ہی کمزور ہوتے ہیں۔
صحت مند افراد کے لیے خطرہ: ماہرین کا کہنا ہے کہ وہ لوگ جن کے گردے مکمل صحت مند ہیں، اگر وہ بھی طویل عرصے تک اور زیادہ مقدار میں یہ ادویات لیں گے، تو وہ بھی گردوں کے امراض کا شکار ہو سکتے ہیں۔
نیشنل فارمیسی ایسوسی ایشن کے چیئرمین اولیویئر پیکارڈ کا کہنا ہے کہ ہر دوا جہاں شفا فراہم کرتی ہے، وہیں اس کا غلط یا حد سے زیادہ استعمال زہر کا کام بھی کر سکتا ہے۔ مریضوں کو مشورہ دیا گیا ہے کہ وہ درد کی صورت میں ادویات لینے سے پہلے مستند ڈاکٹر یا فارماسسٹ سے رجوع کریں۔