سفید بال کالے کرنے کا ہزاروں سالہ قدیم نسخہ، حیرت انگیز نتائج

عمر کے ساتھ سفید ہونے والے بال اکثر لوگوں کے اعتماد کو متاثر کرتے ہیں اور بہت سے افراد اس مسئلے کے حل کے لیے مختلف طریقے آزمانے کی کوشش کرتے ہیں۔ ماہرین کے مطابق خوراک میں گوشت، دودھ، دودھ سے بنی اشیاء اور انڈے کی زردی شامل کرنے سے بھی اس مسئلے میں مدد مل سکتی ہے۔

اے آر وائی ڈیجیٹل کے ایک پروگرام میں معروف ہربلسٹ غالب آغا نے سفید بالوں کو قدرتی طور پر سیاہ کرنے کے لیے ایک قدیم نسخہ تجویز کیا جسے تقریباً پانچ ہزار سال پرانا بتایا جاتا ہے۔ انہوں نے بتایا کہ ترپھلا نامی جڑی بوٹیوں سے تیار کردہ مرکب بالوں کی سفیدی کم کرنے میں مددگار ثابت ہو سکتا ہے۔

ترپھلا دراصل تین اجزاء آملہ، ہڑڑ اور بہیڑہ پر مشتمل سفوف ہے جو صدیوں سے مختلف بیماریوں کے علاج میں استعمال کیا جا رہا ہے۔ اسے معدہ، جگر اور خون سے متعلق مسائل کے لیے بھی مفید سمجھا جاتا ہے۔

ان کے مطابق ان تینوں جڑی بوٹیوں کو برابر مقدار میں لے کر پیس کر پاؤڈر بنا لیا جائے اور روزانہ رات سونے سے تقریباً آدھا گھنٹہ پہلے ایک چائے کا چمچ تازہ پانی کے ساتھ استعمال کیا جائے۔ ان کا کہنا تھا کہ کچھ عرصے تک استعمال کے بعد بالوں کی سیاہی میں بہتری آ سکتی ہے جبکہ معدے کے مسائل میں بھی فائدہ ہو سکتا ہے۔

ماہرین صحت کے مطابق بالوں کے قبل از وقت سفید ہونے کی ایک بڑی وجہ جسم میں وٹامن بی 12 اور فولک ایسڈ کی کمی بھی ہوتی ہے، جس کے باعث کم عمری میں ہی بال سفید ہونے لگتے ہیں۔

نوٹ: کسی بھی گھریلو یا جڑی بوٹیوں کے نسخے کو استعمال کرنے سے پہلے طبی ماہر سے مشورہ کرنا بہتر ہوتا ہے۔