زندگی مشکل بنانے والے افراد سے تعلق آپ کو جلد بوڑھا بنا دیتا ہے، تحقیق

اگر آپ ایسے افراد کے ساتھ وقت گزارتے ہیں جو مسلسل مسائل پیدا کرتے ہیں یا زندگی مشکل بنا دیتے ہیں تو یہ آپ کی صحت پر منفی اثر ڈال سکتا ہے۔ نئی طبی تحقیق کے مطابق ایسے افراد کے ساتھ تعلق رکھنے سے بڑھاپے کی رفتار تیز ہو جاتی ہے۔

یہ دعویٰ ایک تحقیق میں سامنے آیا جو جرنل Proceedings of the National Academy of Sciences میں شائع ہوئی۔ تحقیق میں بتایا گیا کہ جھگڑالو افراد یا مسائل پیدا کرنے والے افراد کے ساتھ رابطے میں رہنے سے تناؤ کی سطح بڑھ جاتی ہے اور جسمانی و ذہنی افعال کی حیاتیاتی عمر (Biological Age) میں اضافہ ہوتا ہے۔

ماہرین کے مطابق حیاتیاتی عمر وہ پیمانہ ہے جو جسمانی اور ذہنی صحت کی حالت کے مطابق بڑھاپے کی حقیقت کو ظاہر کرتا ہے، اور جینز، طرزِ زندگی اور ماحول اس پر اثر انداز ہوتے ہیں۔ تحقیق میں واضح کیا گیا کہ حیاتیاتی عمر جتنی زیادہ ہوگی، مختلف امراض اور صحت کے خطرات بھی اتنے ہی بڑھ جائیں گے۔

نتائج سے یہ بات سامنے آئی ہے کہ منفی رویے اور جھگڑالو افراد کے اثرات صرف ذہنی دباؤ تک محدود نہیں بلکہ یہ جسمانی صحت اور بڑھاپے کی رفتار پر بھی اثر انداز ہوتے ہیں، اس لیے اپنے گرد ایسے افراد رکھنے سے گریز کرنا صحت کے لیے فائدہ مند ہے۔