سیڑھیاں چڑھتے ہوئے اکثر افراد کا سانس کیوں پھول جاتا ہے؟

کیا آپ نے کبھی غور کیا ہے کہ چند منزل سیڑھیاں چڑھنے کے بعد سانس پھولنے لگتی ہے؟ دلچسپ بات یہ ہے کہ یہ مسئلہ صرف عام افراد کو ہی نہیں بلکہ میراتھن دوڑنے والے ایتھلیٹس کو بھی پیش آ سکتا ہے۔

ماہرین کے مطابق زمین پر دوڑنے کے مقابلے میں سیڑھیاں چڑھتے وقت جسم مختلف انداز سے کام کرتا ہے اور اس کی بنیادی وجہ ہمارے مسلز ہیں۔ مشی گن یونیورسٹی کے پروفیسر ٹموتھی جے مائیکل کے مطابق جسم کے پٹھوں میں دو اقسام کے مسل فائبرز ہوتے ہیں: ایک سست رفتار سے کام کرنے والے اور دوسرے تیزی سے متحرک ہونے والے۔

سست رفتار مسل فائبرز طویل فاصلے کی سرگرمیوں میں مدد دیتے ہیں اور تھکاوٹ کے خلاف مزاحمت رکھتے ہیں، جبکہ تیزی سے متحرک ہونے والے مسل فائبرز اس وقت استعمال ہوتے ہیں جب جسم کو اچانک زیادہ طاقت درکار ہو، جیسے چھلانگ لگانا یا سیڑھیاں چڑھنا۔

ماہرین کا کہنا ہے کہ سیڑھیاں چڑھنا جسم کے لیے نسبتاً مشکل سرگرمی ہے کیونکہ اس دوران جسم کو زیادہ طاقت درکار ہوتی ہے۔ مڈ ویسٹرن اسٹیٹ یونیورسٹی کے فزیولوجسٹ پروفیسر فرینک وائٹ کے مطابق اس عمل کے دوران جسم میں کاربن ڈائی آکسائیڈ اور ہائیڈروجن کے حوالے سے حساسیت بڑھ جاتی ہے جس سے تھکاوٹ جلد محسوس ہونے لگتی ہے اور سانس تیز ہو جاتی ہے۔

سیڑھیاں چڑھنے کے دوران کششِ ثقل کے خلاف کام کرنا بھی سانس پھولنے کی ایک بڑی وجہ ہے۔ ماہرین کے مطابق اس دوران انسان اپنے جسمانی وزن کو اوپر کی جانب اٹھا رہا ہوتا ہے، جس کے لیے زیادہ مسلز اور توانائی درکار ہوتی ہے۔

اس کے علاوہ روزمرہ زندگی میں سیڑھیاں چڑھنے سے پہلے کسی قسم کا وارم اپ نہ کرنا بھی اس مسئلے کی ایک وجہ ہے۔ جب مسلز اچانک زیادہ محنت کرتے ہیں تو جسم کو زیادہ آکسیجن درکار ہوتی ہے اور سانس تیز ہو جاتی ہے۔

ماہرین کا کہنا ہے کہ سیڑھیاں چڑھنے کے دوران بعض ایسے مسلز بھی استعمال ہوتے ہیں جو عام طور پر کم متحرک ہوتے ہیں، اسی وجہ سے یہ سرگرمی بظاہر آسان ہونے کے باوجود جسم کے لیے زیادہ مشکل ثابت ہوتی ہے۔

طبی ماہرین کے مطابق اگر سیڑھیاں چڑھتے وقت سانس پھول جائے تو ضروری نہیں کہ اس کا مطلب جسمانی کمزوری ہو، بلکہ یہ جسم کا قدرتی ردعمل بھی ہو سکتا ہے۔ تاہم اگر سانس لینے میں غیر معمولی دشواری یا سینے میں درد محسوس ہو تو ڈاکٹر سے مشورہ کرنا ضروری ہے۔