ذہنی تناؤ گنج پن کا شکار کیسے بنا دیتا ہے؟

عمر بڑھنے کے ساتھ بالوں کا کم ہونا ایک قدرتی عمل ہے اور مردوں میں گنج پن کا امکان خواتین کے مقابلے میں زیادہ ہوتا ہے، تاہم ماہرین کے مطابق شدید یا طویل تناؤ بھی بالوں کے تیزی سے گرنے کی ایک بڑی وجہ بن سکتا ہے۔

امریکا کے طبی ادارے مایو کلینک کے مطابق ذہنی دباؤ کا شکار افراد میں بالوں کے گرنے کی رفتار بڑھ جاتی ہے جبکہ نئے بالوں کی نشوونما سست پڑ جاتی ہے۔ یہ مسئلہ مردوں اور خواتین دونوں کو متاثر کر سکتا ہے اور اکثر اوقات عارضی ہوتا ہے، تاہم بعض صورتوں میں یہ گنج پن کا باعث بھی بن سکتا ہے۔

ماہرین کے مطابق جب جسم میں تناؤ کے ہارمون کورٹیسول کی سطح بڑھ جاتی ہے تو بالوں کی جڑیں غیر متحرک ہو جاتی ہیں، جس کے نتیجے میں نئے بال نہیں اگتے جبکہ موجودہ بال ٹوٹتے رہتے ہیں۔ 2021 میں چوہوں پر ہونے والی ایک تحقیق میں اس عمل کے حیاتیاتی نظام کو واضح کیا گیا تھا۔

تحقیقات سے یہ بھی معلوم ہوا ہے کہ طویل تناؤ مدافعتی نظام کو زیادہ متحرک کر دیتا ہے جس سے بعض افراد میں الوپیشیا (Alopecia) جیسی کیفیت پیدا ہو سکتی ہے، جس میں سر کے مخصوص حصوں سے بال اڑنے لگتے ہیں۔

ماہرین کے مطابق تناؤ کے نتیجے میں بالوں سے محرومی کی تین بڑی اقسام سامنے آ سکتی ہیں۔ پہلی ٹیلوجن ایفلوویئم (Telogen effluvium) ہے جس میں بالوں کی جڑیں وقتی طور پر غیر فعال ہو جاتی ہیں اور بال بڑی تعداد میں جھڑنے لگتے ہیں۔ دوسری قسم الوپیشیا ہے جس میں جسم کا مدافعتی نظام بالوں کی جڑوں پر حملہ آور ہو جاتا ہے۔ تیسری حالت ٹرائیکوٹیلومینیا (Trichotillomania) ہے جس میں شدید تناؤ کے باعث بعض افراد اپنے ہی بال کھینچ کر توڑنے لگتے ہیں۔

ماہرین کا کہنا ہے کہ اگر تناؤ کو کم کر لیا جائے تو اکثر صورتوں میں بالوں کی نشوونما دوبارہ ممکن ہو جاتی ہے۔ تاہم کسی بھی مسئلے کی صورت میں ماہر معالج سے مشورہ کرنا ضروری ہے۔