اے آئی ٹیکنالوجی سے الزائمر کی پیشگی تشخیص میں بڑی پیشرفت

محققین کا کہنا ہے کہ اب مصنوعی ذہانت (AI) کی مدد سے الزائمر کی بیماری کی پیشگوئی تقریباً 93 فیصد درستگی کے ساتھ کی جا سکتی ہے۔ امریکہ کی ریاست میساچوسٹس میں قائم ورسسٹر پولی ٹیکنک انسٹیٹیوٹ کے مطابق 800 سے زائد دماغی سکینز کے تجزیے نے AI کو یہ صلاحیت دی کہ وہ دماغ میں ہونے والی ساختی تبدیلیوں کو پہچان سکے، جو ڈیمنشیا کی سب سے عام قسم یعنی الزائمر کے آغاز کا اشارہ دیتی ہیں۔
تحقیق سے ظاہر ہوا کہ AI نہ صرف الزائمر کے ابتدائی خطرات کی نشاندہی کر سکتی ہے بلکہ بیماری کے امکان کی پیشگوئی اور ان مریضوں کی شناخت میں بھی مددگار ہے جن میں بیماری موجود ہو مگر تشخیص نہیں ہوئی۔ ماہرین کے مطابق ابتدائی تشخیص مریضوں اور ڈاکٹروں کو قیمتی وقت فراہم کر سکتی ہے تاکہ بیماری کی رفتار کو سست کیا جا سکے اور بہتر تیاری ممکن ہو۔