پاکستان نے بھارت، اسرائیل اور بیرون ممالک کے سائبر حملوں کا توڑ نکال لیا

پاکستان نے بھارت، اسرائیل اور دیگر بیرون ممالک سے ہونے والے ممکنہ سائبر حملوں کا مؤثر توڑ نکالنے کے لیے جدید سکیورٹی نظام تیار کر لیا ہے۔

قومی کمپیوٹر ایمرجنسی رسپانس ٹیم (نیشنل سرٹ) کے حکام کے مطابق ایک جدید اینٹی وائرس اور سکیورٹی سسٹم تیار کیا گیا ہے جو سائبر حملوں کی فوری شناخت اور ان کے خلاف بروقت ردعمل دینے کی صلاحیت رکھتا ہے۔

حکام کا کہنا ہے کہ ای ڈی آر (اینڈ پوائنٹ ڈیٹیکشن اینڈ رسپانس) سافٹ ویئر ملک بھر کے سرکاری کمپیوٹر سسٹمز میں انسٹال کر دیا گیا ہے تاکہ سرکاری ڈیٹا اور نیٹ ورکس کو سائبر خطرات سے محفوظ بنایا جا سکے۔

نیشنل سرٹ کے مطابق ای ڈی آر ایپ کو موبائل فونز پر انسٹال کرنے کے لیے ٹیسٹنگ کا عمل بھی جاری ہے، جس کے بعد اسے مزید اداروں اور صارفین کے لیے دستیاب کیا جائے گا۔

ماہرین کے مطابق اس جدید سسٹم سے پاکستان کی سائبر سکیورٹی کو مزید مضبوط بنانے میں مدد ملے گی اور حساس سرکاری نظام کو بیرونی حملوں سے محفوظ رکھا جا سکے گا۔