وزیراعظم جلد ہاؤسنگ انڈسٹری کیلئے پیکج کا اعلان کریں گے: ایس ایم تنویر

پیٹرن انچیف یونائیٹڈ بزنس گروپ ایس ایم تنویر نے کہا ہے کہ وزیراعظم جلد ہاؤسنگ انڈسٹری کے لیے خصوصی پیکج کا اعلان کریں گے جس کا مقصد معیشت کی بحالی اور روزگار کے مواقع پیدا کرنا ہے۔

ایف پی سی سی آئی کے عہدیداروں کے ہمراہ پریس کانفرنس کرتے ہوئے ایس ایم تنویر نے کہا کہ حکومت تعمیراتی شعبے کو فعال بنانے کے لیے اہم اقدامات پر غور کر رہی ہے۔ ان کا کہنا تھا کہ کنسٹرکشن انڈسٹری ملک کی معیشت میں ریڑھ کی ہڈی کی حیثیت رکھتی ہے۔

انہوں نے بتایا کہ ملک میں 78 سے زائد صنعتیں تعمیراتی شعبے سے وابستہ ہیں جبکہ پاکستان میں اس وقت تقریباً ایک کروڑ 20 لاکھ گھروں کی قلت ہے۔ ان کے مطابق جب گھروں کی تعمیر جاری تھی تو تقریباً 50 لاکھ افراد کو روزگار حاصل تھا، تاہم تعمیراتی سرگرمیاں رکنے سے تقریباً 55 لاکھ افراد کا روزگار متاثر ہوا۔

ایس ایم تنویر کا کہنا تھا کہ ملک کو معاشی بحران سے نکالنے کے لیے مشترکہ کوششوں کی ضرورت ہے۔ انہوں نے کہا کہ جب کنسٹرکشن انڈسٹری میں منافع کم ہوا تو سرمایہ کار اس شعبے سے نکل گئے۔

انہوں نے مزید کہا کہ سالانہ تین لاکھ اضافی گھر تعمیر کرنا ایک بڑا چیلنج ہے اور اس مقصد کے لیے تمام اسٹیک ہولڈرز کو ساتھ لے کر چلنا ہوگا۔ ان کا کہنا تھا کہ فائلر، نان فائلر اور لیٹ فائلر کی کیٹیگری کو بھی فوری ختم کیا جانا چاہیے۔