غیر ملکی خواتین سے جنسی زیادتی اور اغوا کا کیس: ملزمان کا مزید 5 دن کا جسمانی ریمانڈ منظور

لاہور کی کینٹ کچہری میں غیر ملکی خواتین کو اغوا اور جنسی زیادتی کا نشانہ بنانے کے ہولناک مقدمے کی سماعت ہوئی، جہاں عدالت نے تینوں نامزد ملزمان کا مزید 5 دن کا جسمانی ریمانڈ منظور کرتے ہوئے انہیں تفتیش کے لیے پولیس کے حوالے کر دیا ہے۔ جوڈیشل مجسٹریٹ اظہر محمود نے کیس کی سماعت کی، جس کے دوران ملزمان رضوان، ناصر اور نواز کو چہرے پر ماسک لگا کر پولیس کے سخت ترین سیکیورٹی حصار میں عدالت کے روبرو پیش کیا گیا۔

سماعت کے دوران تفتیشی افسر نے عدالت کو آگاہ کیا کہ ملزمان کا طبی معائنہ (میڈیکل ٹیسٹ) مکمل کیا جا چکا ہے، تاہم مقدمے کی کڑیاں جوڑنے اور ثبوت اکٹھے کرنے کے لیے ابھی ملزمان سے اہم اشیاء کی برآمدگی باقی ہے۔ تفتیشی افسر کے مطابق، غیر ملکی خواتین سے لوٹی گئی سونے کی انگوٹھی اور قیمتی گھڑی (واچ) کی ریکوری کرنا باقی ہے جس کے لیے ملزمان کا مزید جسمانی ریمانڈ درکار ہے۔ عدالت نے پولیس کی استدعا منظور کرتے ہوئے ریمانڈ میں 5 دن کی توسیع کر دی۔