انوکھا ہوٹل جہاں شیر کے بچے صبح مہمانوں کو اٹھانے کا کام کرتے ہیں

تصور کریں کہ آپ کسی ہوٹل میں قیام کریں اور وہاں صبح آپ کو اٹھانے کا کام ایک شیر کا بچہ کرے تو پھر کیسا محسوس کریں گے؟

یقین کرنا مشکل ہوگا مگر چین میں ایک ہوٹل واقعی ایسی خصوصی سروس فراہم کر رہا ہے۔اس خصوصی سروس کے تحت ہوٹل میں قیام کرنے والوں کو صبح اپنے کمرے میں شیر کے بچے کے ساتھ کھیلنے کا موقع فراہم کیا جاتا ہے۔چین کے صوبے جیانگسو کے علاقے Suqian میں واقع ہیپی ریزورٹ کنٹری سائیڈ ریزورٹ نامی ہوٹل میں یہ انوکھی سروس فراہم کی جا رہی ہے۔20 کمروں پر مشتمل اس ہوٹل میں اس سروس کے ساتھ ایک کمرے کا ایک رات کا کرایہ 628 یوآن رکھا گیا ہے۔شیر کے بچے کی یہ سروس صبح 8 سے 10 بجے تک دستیاب ہوتی ہے اور ہر کمرے میں اسے 7 منٹ تک قیام کرنے دیا جاتا ہے۔اس کے لیے کمرے میں رہنے والوں کو پہلے ایک معاہدے پر دستخط کرنا ہوتے ہیں۔شیر کے بچے کے ساتھ ایک نگہبان ہمیشہ ہوتا ہے اور مہمانوں کو مشورہ دیا جاتا ہے کہ وہ اپنے تحفظ کا خیال رکھیں۔ہوٹل کے عملے کے مطابق یہ سروس فراہم کرنا قانونی ہے اور ہم نے شیروں کی پرورش کے لیے سرکاری اداروں میں رجسٹریشن کرائی ہے۔