حج آپریشنز ڈیجیٹل بنانے کیلئے وزارتِ آئی ٹی اور مذہبی امور میں معاہدہ

وزیراعظم شہباز شریف کی ہدایات پر حج آپریشنز کو مکمل طور پر ڈیجیٹل بنانے کی جانب اہم پیش رفت ہوئی ہے۔ وزارتِ مذہبی امور اور وزارتِ آئی ٹی کے درمیان اس سلسلے میں ایک مفاہمت کی یادداشت پر دستخط کیے گئے ہیں، جس کا مقصد حج کے عمل کو شفاف، سہل اور انسانی غلطیوں سے پاک بنانا ہے۔ اس موقع پر وفاقی وزیر مذہبی امور سردار محمد یوسف اور وفاقی وزیر آئی ٹی شزا فاطمہ خواجہ سمیت اعلیٰ حکام موجود تھے۔

اس نئے نظام کے تحت آئندہ سال حج کی درخواست جمع کروانے سے لے کر وطن واپسی تک تمام مراحل “اینڈ ٹو اینڈ” ڈیجیٹل ہوں گے۔ عازمینِ حج کے لیے ایک سادہ اور آسان فہم آن لائن پورٹل قائم کیا جائے گا، جبکہ ‘پاک حج’ موبائل ایپ کو بھی جدید تقاضوں کے مطابق اپ گریڈ کیا جائے گا۔ وفاقی وزیر شزا فاطمہ کے مطابق، اس ڈیجیٹلائزیشن سے اسٹیک ہولڈرز کے درمیان مؤثر رابطہ ممکن ہوگا اور سعودی ٹائم لائنز کی پابندی یقینی بنائی جائے گی، جس سے عازمین کو کسی بھی قسم کی غیر ضروری تاخیر کا سامنا نہیں کرنا پڑے گا۔