پاکستان کی پہلی فلائی گاڑی جناح ون 2028 میں چاند پر اترے گی: چیئرمین سپارکو

پاکستان سپیس اینڈ اپر ایٹموسفیئر ریسرچ کمیشن (سپارکو) کے چیئرمین یوسف خان نے اعلان کیا ہے کہ پاکستان اب یورپی اور چینی سیٹلائٹس پر انحصار ختم کر کے مکمل طور پر اپنی سیٹلائٹ ٹیکنالوجی پر منتقل ہو رہا ہے، جبکہ پاکستان کی پہلی چاند گاڑی ‘جناح ون’ (Jinnah-1) سال 2028ء میں چاند کی سطح پر اترے گی۔ ورلڈ سپیس ویک کی تقریب سے خطاب کرتے ہوئے انہوں نے کہا کہ ایسے بین الاقوامی ایام نوجوانوں کو خلائی ٹیکنالوجی سے روشناس کروانے میں اہم کردار ادا کرتے ہیں اور حالیہ برسوں میں قومی خلائی پروگرام نے غیر معمولی کامیابی حاصل کی ہے۔

چیئرمین سپارکو نے خلائی مشنز کی تفصیلات بتاتے ہوئے انکشاف کیا کہ جنوری 2025ء میں پاکستان نے اپنا ‘ای ون’ (E-1) سیٹلائٹ خلا میں بھیجا، جس کے بعد جولائی 2025ء اور اکتوبر میں مزید دو سیٹلائٹس مدار میں بھیجے گئے۔ اس وقت پاکستان کے چھ ارتھ آبزرویشن سیٹلائٹس خلا میں سرگرم عمل ہیں جو زراعت، شہری منصوبہ بندی، انٹرنیٹ اور ٹی وی کوریج کی توسیع اور قدرتی آفات سے نمٹنے کی قومی صلاحیتوں کو مضبوط بنانے میں معاون ثابت ہو رہے ہیں۔