چیٹ جی پی ٹی صارفین کو نئے آن لائن فراڈ سے خبردار کردیا گیا

چیٹ جی پی ٹی (ChatGPT) استعمال کرنے والے صارفین کو ایک نئے اور خطرناک آن لائن فراڈ سے خبردار کیا گیا ہے، جس میں سائبر مجرمان جعلی پیغامات اور لنکس کا سہارا لے کر صارفین کو نقصان دہ ویب سائٹس کی طرف راغب کر رہے ہیں۔ رپورٹس کے مطابق اس فراڈ کا آغاز اس وقت ہوتا ہے جب صارف گوگل پر چیٹ جی پی ٹی تلاش کرتا ہے۔ سرچ نتائج میں اوپر ظاہر ہونے والے اسپانسرڈ (Sponsored) اشتہار کے ذریعے صارف بظاہر اصل ویب سائٹ پر پہنچتا ہے، جہاں ایک جعلی کسٹم جی پی ٹی پیش کیا جاتا ہے۔ دھوکہ دہی کو مزید مستند بنانے کے لیے اس جعلی جی پی ٹی کو “پلس 5.6” کا نام دیا گیا ہے تاکہ صارف اسے اوپن اے آئی کا نیا ماڈل يا رسمی فیچر سمجھ لے۔

اس جعلی کسٹم جی پی ٹی میں صارف کے کسی بھی سوال کے جواب میں ایک مخصوص پیغام دکھایا جاتا ہے، جس میں دعویٰ کیا جاتا ہے کہ بنیادی ڈومین پر سروس محدود ہے، لہٰذا چیٹ جی پی ٹی پلس میں اپ گریڈ کریں یا دیے گئے متبادل لنک پر جائیں۔ سائبر سیکیورٹی ماہرین کے مطابق خطرناک ترین مرحلہ تب شروع ہوتا ہے جب صارف اس متبادل یا بیک اپ ڈومین پر کلک کرتا ہے، جس سے اس کے کمپیوٹر یا موبائل میں میلویئر (Malware) انسٹال ہونے یا حساس ذاتی معلومات چوری ہونے کا شدید خطرہ ہوتا ہے۔ ماہرین نے صارفین کو ہدایت کی ہے کہ وہ اسپانسرڈ لنکس پر آنکھیں بند کر کے کلک نہ کریں اور کسی بھی لنک کو کھولنے سے قبل ویب ایڈریس (URL) کی مکمل تصدیق لازمی کریں۔