دبئی میں بزرگ شہریوں کیلئے نئے ہیریٹیج ولیج منصوبے کا باقاعدہ آغاز

دبئی میں سینئر شہریوں اور بزرگ افراد کی فلاح و بہبود کے لیے ایک جدید اور منفرد ‘ہیریٹیج ولیج’ منصوبے کا باقاعدہ آغاز کر دیا گیا ہے۔ اس منصوبے کا بنیادی مقصد بزرگ شہریوں کو ایک مربوط، محفوظ اور باوقار ماحول فراہم کرنا ہے جہاں وہ مختلف سماجی، ثقافتی، صحت اور تفریحی سرگرمیوں میں فعال طور پر حصہ لے سکیں۔ ‘خلیج ٹائمز’ کی رپورٹ کے مطابق، یہ شاندار اقدام ‘دبئی اوقاف’ نے ‘امارات ایسوسی ایشن فار کیئر اینڈ ویلفیئر آف پیرنٹس’ (رأس الخیمہ) کے تعاون سے شروع کیا ہے، جسے ‘السیاح اینڈومنٹ فنڈ’ کے ذریعے فنڈنگ فراہم کی جا رہی ہے۔ یہ منصوبہ 150 سے زائد بزرگ شہریوں کو یکمشت بہترین خدمات اور سہولیات فراہم کرنے کے لیے تیار کیا گیا ہے۔

ہیریٹیج ولیج میں روایتی اماراتی ورثے اور ثقافت سے متاثر ایک خاص ماحول تشکیل دیا گیا ہے تاکہ بزرگوں کے معیارِ زندگی کو بہتر بنانے کے ساتھ ساتھ انہیں قومی شناخت اور ثقافتی اقدار سے جوڑے رکھا جائے۔ اس منصوبے کے تحت 14 روایتی دکانیں قائم کی جائیں گی جن میں مقامي دستکاری، ثقافت اور اماراتی تاریخ کو اجاگر کیا جائے گا۔ علاوہ ازیں، یہاں ثقافتی اور تفریحی تقریبات کے لیے مخصوص ہالز، صحت و تندرستی کی سہولیات اور کھیلوں کی سرگرمیوں کے لیے خصوصی مراعات بھی فراہم کی گئی ہیں۔ دبئی اوقاف کے سیکرٹری جنرل علی محمد المطوع کے مطابق یہ اقدام اس بات کا واضح ثبوت ہے کہ وقف کی رقم کو کس طرح پائیدار اور معاشرتی فلاحی منصوبوں میں کامیابی سے استعمال کیا جا سکتا ہے۔