پاکستان کی پہلی چاند گاڑی ’’جناح ون‘‘ کب چاند پر اترے گی، تاریخ کا اعلان

سپارکو (SUPARCO) نے پاکستان کی پہلی چاند گاڑی “جناح ون” (Jinnah-1) کی سطحِ چاند پر لینڈنگ کی حتمی تاریخ کا اعلان کر دیا ہے۔ ورلڈ سپیس ویک کی تقریب سے خطاب کرتے ہوئے چیئرمین سپارکو یوسف خان نے بتایا کہ پاکستان خلائی ٹیکنالوجی کے شعبے میں تیزی سے خود انحصاری کی طرف گامزن ہے اور ملک کی پہلی چاند گاڑی 2028 میں چاند پر اترے گی۔ انہوں نے کہا کہ پاکستان اب یورپی یا چینی سیٹلائٹس پر انحصار کرنے کے بجائے اپنی خلائی صلاحیتوں کو بروئے کار لا رہا ہے۔

چیئرمین سپارکو نے تفصیلات بتاتے ہوئے کہا کہ جنوری 2025 میں پاکستان نے اپنا سیٹلائٹ “ای ون” خلا میں بھیجا تھا، جس کے بعد جولائی اور اکتوبر 2025 میں مزید دو سیٹلائٹس بھیجے گئے۔ اس وقت پاکستان کے 6 ارتھ آبزرویشن سیٹلائٹس خلا میں فعال ہیں جو زراعت، شہری منصوبہ بندی، انٹرنیٹ و ٹی وی کوریج کی توسیع اور قدرتی آفات سے نمٹنے میں اہم کردار ادا کر رہے ہیں۔ انہوں نے زور دیا کہ خلائی پروگرام کی یہ پیش رفت ملک میں سپیس ٹیکنالوجی کو فروغ دینے کے لیے انتہائی اہم ثابت ہو رہی ہے۔