سالگرہ پر نیا کارنامہ: ڈیوڈ رش نے کم وقت میں پانسوں سے مینار بنا لیا

امریکا کے مشہور سیریل ورلڈ ریکارڈ ہولڈر ڈیوڈ رش نے اپنی سالگرہ کو ایک اور عالمی اعزاز کے ساتھ یادگار بنا لیا ہے۔ ریاست ایڈاہو (Idaho) سے تعلق رکھنے والے ڈیوڈ رش نے اس بار اپنے بھائی، بھابھی اور ایک قریبی دوست کے ساتھ مل کر 20 پانسوں (Dice) کو دو میناروں کی شکل میں کم سے کم وقت میں ترتیب دینے کا چیلنج کامیابی سے مکمل کیا۔

ڈیوڈ رش کے مطابق، ہر مینار میں 10، 10 پانسے ترتیب دینے کا یہ کام بظاہر سادہ معلوم ہوتا ہے لیکن عملی طور پر انتہائی مشکل ثابت ہوا۔ اپنی ویب سائٹ پر تفصیلات شیئر کرتے ہوئے انہوں نے بتایا کہ کوشش کے دوران درجنوں بار مینار گرے اور پانسے بکھر گئے، لیکن ٹیم نے ہمت نہیں ہاری۔ جیسے ہی بیسواں پانسہ درست مقام پر رکھا گیا، وقت روک دیا گیا اور ٹیم نے مطلوبہ ہدف حاصل کر لیا۔ ڈیوڈ رش اب تک سینکڑوں گنیز ورلڈ ریکارڈز اپنے نام کر چکے ہیں، مگر ان کا کہنا ہے کہ اپنوں کے ساتھ مل کر حاصل کیا گیا یہ اعزاز ان کے لیے خاص اہمیت رکھتا ہے۔