ماں کی محبت سے محروم بندر کے بچے کی وائرل ویڈیو نے ہر دل چھو لیا

جاپان کے اچیکاوا چڑیا گھر سے ایک بندر کے بچے کی وائرل ویڈیو نے دنیا بھر میں لوگوں کے جذبات کو چھو لیا ہے۔ بندر کا نام پنچ (Punch) ہے، جو گزشتہ سال جولائی میں پیدا ہوا، لیکن پیدائش کے چند دن بعد اس کی ماں نے اسے اپنانے سے انکار کردیا، جس کے نتیجے میں یہ بچہ ماں کی محبت سے محروم رہ گیا۔

پنچ نے ابتدائی مہینوں میں دوسرے بندروں کے ساتھ دوستی کرنے کی کوشش کی، مگر زیادہ کامیاب نہ ہو سکا۔ چڑیا گھر انتظامیہ نے پنچ کے اکیلے پن کو کم کرنے کے لیے اسے بندر کے شکل والا ایک کھلونا فراہم کیا، جسے وہ ہر وقت اپنے پاس رکھتا ہے۔

وائرل ویڈیو میں پنچ اپنے کھلونے کے ذریعے ماں کی آغوش تلاش کر رہا ہے، جس نے دنیا بھر کے ناظرین کو جذباتی کر دیا۔ چڑیا گھر انتظامیہ کے مطابق پنچ اب آہستہ آہستہ دیگر بندروں کے ساتھ گھلنے ملنے کی کوشش کر رہا ہے اور ذہنی طور پر مضبوط ہو رہا ہے۔

پنچ کی یہ معصوم کوشش اور ماں کی محبت کی تلاش سوشل میڈیا پر لوگوں کی ہمدردی اور محبت کو سمیٹ رہی ہے، اور یہ ویڈیو اب دنیا بھر میں وائرل ہو چکی ہے۔