دبئی میں کم عمر بچے کو موٹر بائیک چلانے پر 50 ہزار درہم جرمانہ

دبئی: دبئی پولیس نے سڑک پر تفریحی الیکٹرک موٹر بائیک چلانے والے ایک کم عمر بچے کے خلاف سخت کارروائی کرتے ہوئے اس کے والدین پر 50 ہزار درہم (تقریباً 38 لاکھ پاکستانی روپے) کا بھاری جرمانہ عائد کر دیا ہے۔ حکام نے قانون کی خلاف ورزی کرنے پر موقع پر ہی موٹر بائیک کو بھی ضبط کر لیا ہے۔

دبئی ٹریفک پولیس کے مطابق، اماراتی قوانین کے تحت کم عمر افراد کو عوامی سڑکوں پر کسی بھی قسم کی موٹر بائیک یا گاڑی چلانے کی قطعی اجازت نہیں ہے۔ حکام کا کہنا ہے کہ اس کارروائی کا مقصد سڑکوں پر حادثات کو روکنا اور شہریوں، بالخصوص بچوں کی زندگیوں کو محفوظ بنانا ہے۔

واضح رہے کہ دبئی کے سخت ٹریفک قوانین کے تحت، ضبط شدہ گاڑی یا بائیک کو چھڑوانے کے لیے مالکان کو ایک لاکھ درہم تک کی اضافی فیس بھی ادا کرنی پڑ سکتی ہے۔ پولیس نے والدین کو تنبیہ کی ہے کہ وہ اپنے بچوں کو سڑکوں پر تفریحی بائیکس چلانے سے روکیں، بصورتِ دیگر اس سے بھی سخت قانونی چارہ جوئی کی جائے گی۔