قومی ہاکی کی زبوں حالی پر قائمہ کمیٹی برہم؛ سپورٹس بورڈ اور ہاکی فیڈریشن ناکام قرار

اسلام آباد: قومی اسمبلی کی قائمہ کمیٹی برائے بین الصوبائی رابطہ کی ذیلی کمیٹی کا اہم اجلاس کنوینر مہرین رزاق بھٹو کی سربراہی میں منعقد ہوا، جس میں پاکستان میں ہاکی کے گرتے ہوئے معیار اور انتظامی بحران کا تفصیلی جائزہ لیا گیا۔ اجلاس میں پاکستان ہاکی فیڈریشن (PHF) کے عبوری صدر محی الدین وانی سمیت دیگر حکام نے شرکت کی۔

اجلاس کے دوران کمیٹی ارکان نے ہاکی کے معاملات پر سخت تشویش کا اظہار کیا۔ کنوینر مہرین رزاق بھٹو نے دو ٹوک الفاظ میں کہا کہ قومی ہاکی ٹیم کے ساتھ جو کچھ ہوا وہ انتہائی بدقسمتی ہے، کمیٹی نے اس معاملے کا سخت نوٹس لے لیا ہے اور اب اس نااہلی کے اصل قصورواروں کا تعین کیا جائے گا۔ انہوں نے مزید کہا کہ “ہمارے دل کرکٹ کی طرح ہاکی کے لیے بھی دھڑکتے ہیں، لیکن ایسا لگتا ہے کہ ہم خود اپنی کھیلوں کو تباہ کرنے پر تلے ہوئے ہیں۔”

رکن کمیٹی خواجہ اظہار الحسن نے کڑی تنقید کرتے ہوئے کہا کہ پاکستان سپورٹس بورڈ اور ہاکی فیڈریشن دونوں ہی اپنے فرائض کی ادائیگی میں مکمل طور پر ناکام ہو چکے ہیں۔ انہوں نے تجویز دی کہ ہاکی کی سنگین صورتحال پر وزیراعظم سے فوری ملاقات کی جائے اور وزیراعظم کو ارسال کی گئی انکوائری رپورٹ قائمہ کمیٹی کے سامنے بھی پیش کی جائے تاکہ حقائق منظر عام پر لائے جا سکیں۔