بھارت: کباڑ فروش نے سونا مالک کو چار ماہ بعد واپس لوٹا دیا

آج کے دور میں جہاں سونے کی قیمتیں آسمان سے باتیں کر رہی ہیں، وہیں بھارت کے شہر فرید آباد میں ایک کباڑیے نے دیانتداری کی ایسی مثال قائم کی ہے جس نے سب کے دل جیت لیے۔ حاجی اختر خان نامی کباڑیے کو پرانے سامان کے ڈھیر سے 100 گرام وزنی سونے کے زیورات ملے، جو اس نے لالچ میں آنے کے بجائے پولیس کے ذریعے اصل مالک کو لوٹا دیے۔

واقعہ کی تفصیلات کے مطابق، اشوک شرما نامی شخص کے خاندان نے چوری کے ڈر سے اپنے زیورات ایک ڈبے میں بند کر کے بوری میں چھپا دیے تھے۔ تاہم، دیوالی کی صفائی کے دوران وہی بوری غلطی سے فضول سامان سمجھ کر کباڑیے کو فروخت کر دی گئی۔ خاندان کو جب اپنی غلطی کا احساس ہوا تو انہوں نے کباڑیے سے رابطہ کیا، لیکن اس وقت تک وہ بوری سامان کے ڈھیر میں کہیں گم ہو چکی تھی۔

تقریباً چار ماہ بعد جب حاجی اختر خان نے خریدے گئے سامان کی چھانٹی شروع کی تو انہیں کاغذ اور پلاسٹک میں لپٹا ہوا پیکٹ ملا جس میں لاکھوں روپے مالیت کے زیورات موجود تھے۔ اختر خان نے فوراً پولیس سے رابطہ کیا اور پولیس کی موجودگی میں زیورات اشوک شرما کے حوالے کر دیے۔ حاجی اختر خان کا کہنا تھا کہ امانت کو اصل مالک تک پہنچانا ان کی اخلاقی ذمہ داری تھی اور اس فیصلے میں ان کے گھر والوں نے بھی ان کا بھرپور ساتھ دیا