خاتون کا والدہ کی میت گھر میں چھپاکر کئی برس تک پنشن وصول کرنے کا انکشاف

جرمنی میں ایک خاتون کی جانب سے اپنی والدہ کی میت گھر میں چھپا کر کئی برس تک پنشن وصول کرنے کا حیران کن واقعہ سامنے آیا ہے۔

میڈیا رپورٹس کے مطابق پولیس نے ایک معمر خاتون کی بوسیدہ لاش اُس وقت برآمد کی جب مقامی میئر کو مسلسل رابطہ نہ ہونے پر معاملہ مشکوک محسوس ہوا۔رپورٹ کے مطابق 1922 میں پیدا ہونے والی صوفی نامی خاتون سے مقامی میئر گزشتہ آٹھ برسوں سے سالگرہ کے موقع پر ملاقات کی کوشش کر رہے تھے، تاہم ہر بار ان کی بیٹی کرسٹا مختلف بہانے بنا کر ملاقات نہیں ہونے دیتی تھی۔

30 دسمبر 2025 کو میئر نے پراسیکیوٹر آفس سے رابطہ کیا کیونکہ بیٹی کا یہ دعویٰ مشکوک لگا کہ اس کی والدہ دو سال قبل چیکیا میں انتقال کر چکی ہیں۔5 فروری کو پولیس نے گھر پر کارروائی کے دوران خاتون کی بوسیدہ لاش برآمد کر لی۔ پوسٹ مارٹم میں موت کی وجہ اور وقت کا تعین نہیں ہو سکا اور قتل کے شواہد بھی سامنے نہیں آئے۔حکام کے مطابق متوفیہ کی تقریباً 1500 یورو ماہانہ پنشن بدستور وصول کی جا رہی تھی، جس کے باعث دھوکہ دہی کی تحقیقات شروع کر دی گئی ہیں۔ پولیس کا کہنا ہے کہ مشتبہ بیٹی اس وقت ایک طبی کلینک میں زیر علاج ہے۔