امریکا: مقابلے کے دوران باکسر کی وِگ اکھڑ گئی

نیویارک: امریکی ہیوی ویٹ باکسر Jarrell Miller نے ہفتے کے روز نیویارک میں ہونے والے اپنے مقابلے میں سنسنی خیز انداز میں کامیابی حاصل کرلی، تاہم میچ کے دوران ایک دلچسپ واقعہ بھی پیش آیا۔

یہ مقابلہ مشہور مقام Madison Square Garden میں منعقد ہوا جہاں ان کا سامنا برطانوی نژاد حریف Kingsley Ibeh سے تھا۔

میچ کے دوران حریف کی جانب سے لگاتار گھونسوں کی بوچھاڑ کے باعث جیرل ملر کے سر پر موجود ہیئر پیس (وِگ) سامنے سے ڈھیلا ہوکر اکھڑنے لگا۔ راؤنڈ کے اختتام پر جب انہیں صورتحال کا اندازہ ہوا تو 37 سالہ باکسر مسکرا دیے اور وِگ اٹھا کر تماشائیوں کی جانب اچھال دی، جس پر حاضرینِ محفل نے خوب داد دی۔

دلچسپ واقعے کے باوجود جیرل ملر نے حوصلہ برقرار رکھا اور سخت مقابلے کے بعد اسپلٹ ڈیسیژن کے ذریعے فتح اپنے نام کرلی۔

میچ کے بعد گفتگو کرتے ہوئے ملر نے بتایا کہ بلیچ والے شیمپو کے استعمال سے ان کے بال متاثر ہوگئے تھے، جس کے باعث انہیں عارضی طور پر ٹوپی نما وِگ کا استعمال کرنا پڑا تھا۔