سال کا پہلا سورج گرہن 17 فروری کو ہوگا، پاکستان میں نظر نہیں آئے گا

ماہرین فلکیات نے کہا ہے کہ رواں سال کا پہلا سورج گرہن 17 فروری کو ہوگا، تاہم یہ پاکستان سمیت ایشیا کے زیادہ تر ممالک میں دکھائی نہیں دے گا۔

سپیس ڈاٹ کام کی رپورٹ کے مطابق یہ گرہن انٹارکٹکا کے دورافتادہ حصوں میں دیکھا جائے گا، جہاں سورج آگ کے ایک گولے کی مانند نظر آئے گا۔ یہ منظر اس وقت پیدا ہوگا جب چاند اپنے بیضوی مدار میں سورج کے عین سامنے آ جائے گا۔

چاند مکمل طور پر سورج کو ڈھانپ نہیں پاتا، جس کے باعث سورج کی کرنیں سرخی مائل دکھائی دیں گی اور چاند کا سایہ سورج پر پھیلتا جائے گا۔ سورج ایک روشن چاند کی طرح نظر آئے گا اور اگلے مرحلے میں “رنگ آف فائر” کا منظر ابھرے گا۔

ماہرین کے مطابق اس دوران آسمان قدرے تاریک ہو جائے گا اور سورج کا بیرونی کنارہ سنہری حلقے کی مانند نظر آئے گا۔ یہ منظر تقریباً دو گھنٹے تک جاری رہے گا، جس کے بعد سنہری حلقہ دھیرے دھیرے ختم ہونا شروع ہوگا۔ بعد میں چاند سورج کے سامنے سے ہٹنا شروع کرے گا اور آخرکار مکمل طور پر سامنے سے ہٹ جائے گا۔

ماہرین نے خبردار کیا ہے کہ سورج گرہن کو براہِ راست دیکھنا بینائی کے لیے خطرناک ہو سکتا ہے، اس لیے اگر دیکھنا بھی ہو تو خصوصی چشمے یا سولر فلٹر استعمال کیے جائیں۔

مزید برآں، تقریباً دو ہفتے بعد 3 مارچ کو سال کا پہلا بلڈ مون نظر آئے گا، جس میں چاند سرخ مائل دکھائی دے گا اور شمالی امریکہ، مشرقی ایشیا اور آسٹریلیا میں دیکھا جائے گا۔