پشاور کے عمران خان اسٹیڈیم میں پی ایس ایل کے میچز منعقد کرنے کا اعلان

پاکستان سپر لیگ (پی ایس ایل) کے میچز رواں سال پہلی بار پشاور میں کرانے کا اعلان کر دیا گیا ہے۔ خیبر پختونخوا میں سکیورٹی کے اعلیٰ اجلاس کے بعد فیصلہ کیا گیا کہ پشاور کے عمران خان کرکٹ اسٹیڈیم میں میچز ہوں گے۔

پاکستان کرکٹ بورڈ کے چیئرمین محسن نقوی نے انٹر اسکولز کرکٹ ٹورنامنٹ کے فائنل میں شرکت کرتے ہوئے کہا کہ قومی ٹیم کے 60 فیصد کھلاڑی خیبر پختونخوا سے ہیں، جو صوبے کے ٹیلنٹ کی عکاسی ہے۔

نقوی نے کہا کہ صوبے کے لیے دو ٹیمیں بنانے کا مقصد کھلاڑیوں کو زیادہ مواقع دینا ہے۔ بھارت کے خلاف ورلڈ کپ میچ کے بائیکاٹ پر انہوں نے کہا کہ یہ فیصلہ صرف بنگلہ دیش کی عزت کے لیے تھا اور اس میں کسی دباؤ یا شرط کا تعلق نہیں تھا۔

پی ایس ایل کا 11واں ایڈیشن 26 مارچ سے 3 مئی تک جاری رہے گا۔