نومولود بچوں کی ایک حیرت انگیز صلاحیت کا انکشاف

ایک دلچسپ تحقیق کے مطابق نومولود بچے پیدائش کے فوراً بعد ہی موسیقی کے آہنگ اور ردہم کو سمجھنے کی صلاحیت رکھتے ہیں۔

یہ تحقیق Italian Institute of Technology نے کی، جس میں معلوم ہوا کہ بچے ماں کے پیٹ میں ہی موسیقی کے ردعمل ظاہر کرنا شروع کر دیتے ہیں، اور پیدائش کے بعد بھی ان کے دماغ موسیقی کو پراسیس کرنے کی صلاحیت رکھتے ہیں۔

تحقیق میں یہ دریافت ہوا کہ نومولود بچے موسیقی کے آہنگ سے جڑے پیٹرن کی پیشگوئی کر سکتے ہیں، یعنی وہ ردہم کو فطری طور پر سمجھتے ہیں۔ تاہم سُروں کو سمجھنے کے لیے شعور کی ضرورت ہوتی ہے، اسی وجہ سے دنیا کے مختلف خطوں میں سروں کا استعمال مختلف مگر آہنگ تقریباً یکساں ہوتا ہے۔

ماہرین نے EEG (Electroencephalography) کے ذریعے نومولود بچوں کی دماغی سرگرمیوں کا ڈیٹا حاصل کیا۔ سوتے ہوئے بچوں کے کانوں پر ائیرفونز لگا کر موسیقی اور دیگر آوازیں سنائی گئیں، جس کے بعد کمپیوٹر ماڈلز نے ظاہر کیا کہ بچے موسیقی کے آہنگ کو سمجھنے کی صلاحیت رکھتے ہیں۔

یہ تحقیق Journal PLOS Biology میں شائع ہوئی ہے، اور یہ عندیہ دیتی ہے کہ موسیقی اور ردہم کو سمجھنا انسانی فطرت کا حصہ ہے۔