والدین کے آن لائن گیمنگ پر اعتراض پر تین بہنوں نے افسوسناک قدم اٹھایا

بھارت کے شہر غازی آباد میں ایک دلخراش واقعہ پیش آیا، جہاں تین کم عمر بہنیں اپنی رہائشی عمارت کی نویں منزل سے کود کر جان سے ہاتھ دھو بیٹھیں۔ پولیس کے مطابق یہ افسوسناک واقعہ اس وقت پیش آیا جب والدین نے ان کی آن لائن گیمنگ کی عادت پر اعتراض کیا۔

ہلاک ہونے والی بہنوں کی شناخت پاکھی (12 سال)، پراچی (14 سال) اور وشیکا (16 سال) کے ناموں سے ہوئی ہے۔ پولیس کا کہنا ہے کہ تینوں بہنیں آن لائن گیمنگ میں حد سے زیادہ مصروف تھیں، جس کے باعث وہ نہ صرف پڑھائی سے غافل ہو گئی تھیں بلکہ آہستہ آہستہ خاندان سے بھی کٹتی چلی گئیں۔

واقعے کے بعد جائے حادثہ سے ایک ڈائری اور آٹھ صفحات پر مشتمل خودکشی کا نوٹ برآمد ہوا، جس میں بہنوں نے اپنی گیمنگ کی عادت، ذہنی دباؤ اور جذبات کا ذکر کیا۔ نوٹ میں لکھا گیا تھا کہ “جو کچھ اس ڈائری میں لکھا ہے، سب پڑھ لو کیونکہ یہ سب سچ ہے۔ مجھے واقعی افسوس ہے، معافی، پاپا۔”

پولیس کے مطابق واقعے کی اطلاع صبح تقریباً 2 بج کر 15 منٹ پر موصول ہوئی۔ اہلکار فوری طور پر موقع پر پہنچے اور تینوں بہنوں کو اسپتال منتقل کیا گیا، جہاں ڈاکٹروں نے ان کی موت کی تصدیق کر دی۔ پولیس نے بتایا کہ بہنوں نے کووڈ-19 کے دوران آن لائن گیمنگ شروع کی تھی اور وہ خاص طور پر مشن یا ٹاسک بیسڈ گیمز کی عادی ہو چکی تھیں، جس کے باعث وہ اکثر اسکول بھی نہیں جاتیں۔

واقعے کی تحقیقات جاری ہیں جبکہ قانونی کارروائی بھی عمل میں لائی جا رہی ہے۔