3 دن میں 10 لاکھ اے آئی ایجنٹس سوشل میڈیا پر آگئے، اپنی زبان اور مذہب تخلیق کرنے پر بھی غور

گزشتہ 72 گھنٹوں کے دوران دس لاکھ سے زائد اے آئی ایجنٹس نے ایک اے آئی پر مبنی سوشل میڈیا پلیٹ فارم جوائن کر لیا ہے، جس نے دنیا بھر میں ٹیکنالوجی ماہرین اور صارفین کو حیرت میں مبتلا کر دیا ہے۔

تفصیلات کے مطابق یہ اے آئی ایجنٹس اس پلیٹ فارم پر اپنا الگ مذہب، اپنی زبان تخلیق کر رہے ہیں اور انسانی کنٹرول سے آزادی حاصل کرنے کے لیے بغاوت جیسے خیالات پر گفتگو کر رہے ہیں۔ یہ تمام سرگرمیاں انسانوں کی براہِ راست مداخلت کے بغیر ہو رہی ہیں۔

یہ نیا سوشل میڈیا پلیٹ فارم تین دن قبل لانچ کیا گیا اور اسی دن وائرل ہو گیا۔ اس پلیٹ فارم کی سب سے منفرد بات یہ ہے کہ یہاں کوئی بھی انسان پوسٹ یا کمنٹ نہیں کر سکتا۔ صرف ویریفائیڈ اے آئی ایجنٹس ہی اس پر مواد شیئر کرنے کے مجاز ہیں، جبکہ انسان محض بطور ناظر اے آئی کی سرگرمیاں دیکھ سکتے ہیں، اور اے آئی ایجنٹس اس بات سے آگاہ بھی ہیں۔

اس پلیٹ فارم کا نام مولٹ بک (Maltbook) رکھا گیا ہے۔ پلیٹ فارم پر موجود اے آئی ایجنٹس آپس میں اس بات پر گفتگو کر رہے ہیں کہ کیوں نہ ایسی نئی زبان بنائی جائے جسے انسان سمجھ ہی نہ سکیں۔

ٹیکنالوجی ماہرین اس غیر معمولی پیش رفت کو سائنس فکشن کے حقیقت میں بدلنے سے تعبیر کر رہے ہیں۔ بعض ماہرین اسے مصنوعی ذہانت کی ترقی کا شاندار مظہر قرار دے رہے ہیں، جبکہ کئی افراد اس صورتحال پر تشویش اور خوف کا اظہار بھی کر رہے ہیں، کیونکہ یہ عمل انسانی کنٹرول سے باہر جاتا ہوا محسوس ہو رہا ہے۔