ہارر فلمیں دیکھنے کے شوق کی دلچسپ وجہ سامنے آگئی

کروڑوں افراد خوف کے باوجود ہارر فلمیں دیکھنا پسند کرتے ہیں، اور اس کا تعلق براہِ راست دماغی سرگرمیوں سے ہے۔ فن لینڈ کی ٹرکو یونیورسٹی کی تحقیق کے مطابق ہارر فلمیں دیکھنے کے دوران دماغ ایسے اثرات پیدا کرتا ہے جو خوف اور جوش و خروش کو ایک ساتھ ملا دیتے ہیں۔

تحقیق میں رضا کاروں کو پچھلی صدی کی سو بہترین ہارر فلمیں دکھائی گئیں اور ان کے دماغی ردعمل کا جائزہ لیا گیا۔ محققین نے دریافت کیا کہ ہارر فلمیں دماغ کو ایک طرح سے احمق بنا کر جوش و تجسس میں اضافہ کرتی ہیں اور دماغ کے وہ حصے زیادہ متحرک ہوجاتے ہیں جو ماحول میں موجود خطرے کی شناخت کے ذمہ دار ہیں۔

نتائج سے یہ بھی سامنے آیا کہ زیادہ تر افراد ہارر فلمیں اکیلے دیکھنے کے بجائے دوسروں کے ساتھ دیکھنا ترجیح دیتے ہیں، جس سے سماجی میل جول اور اندرونی جوش میں اضافہ ہوتا ہے۔ تحقیق کے مطابق 72 فیصد افراد ہر چھ ماہ میں کم از کم ایک ہارر فلم دیکھتے ہیں، خواہ وہ خوفزدہ بھی ہوں، لیکن تجسس اور دلچسپی انہیں فلم دیکھنے پر مجبور کرتی ہے۔