شادی کی فوٹوگرافی کے دوران حادثہ، شوٹنگ کی ویڈیو وائرل

ممبئی: بھارت میں ہونے والی ایک شادی کی تقریب اس وقت سوشل میڈیا پر غیر معمولی توجہ کا مرکز بن گئی جب فوٹوگرافر اچانک سوئمنگ پول میں جا گرا مگر اس کے باوجود کیمرہ بند نہ کیا اور دلہا دلہن کے لمحات محفوظ کرتا رہا۔

تقریب میں فوٹوگرافر نوبیاہتا جوڑے کے سنیما اسٹائل شاٹس لیتے ہوئے پیچھے کی جانب بڑھ رہا تھا اور اس دوران سوئمنگ پول کی موجودگی نظر انداز کر بیٹھا، جس کے نتیجے میں وہ پانی میں جا گرا۔

دلچسپ بات یہ ہے کہ قریبی افراد فوراً مدد کے لیے آگے بڑھے، مگر فوٹوگرافر نے ہاتھ کے اشارے سے انہیں روکا اور پانی میں کھڑے ہو کر تصاویر لیتا رہا۔ اس غیر متوقع صورتحال کے باوجود اس کا فوکس صرف دلہا دلہن پر رہا، جسے دیکھ کر حاضرین حیران رہ گئے۔

سوشل میڈیا صارفین نے اس کی پیشہ ورانہ لگن اور جذبے کو سراہا اور کہا کہ اس نے اپنے کام کو مقدم رکھتے ہوئے قیمتی لمحات محفوظ کیے۔ کچھ نے اسے مزاحیہ اور متاثر کن دونوں قرار دیا، تو کچھ نے کہا کہ ایسے فوکس اور لگن کم ہی دیکھنے کو ملتی ہے۔