انگلینڈ میں پرفیوم چوری کرنے والی خاتون پر جان لیوس اسٹورز میں پابندی عائد

انگلینڈ اور ویلز میں پولیس کو چکمہ دے کر ہزاروں پاؤنڈ مالیت کے پرفیوم چوری کرنے والی خاتون کو عدالت نے سزا سناتے ہوئے جان لیوس کے تمام اسٹورز میں داخلے پر پابندی عائد کر دی ہے۔

بی بی سی کی رپورٹ کے مطابق 27 سالہ اگیتا سیکا پچھلے ایک سال سے پولیس کو چکمہ دے رہی تھیں اور وہ متعدد بار روپ بدل کر خود کو بچاتی رہیں۔ خاتون کو پہلی مرتبہ اگست 2024 میں مانچسٹر کے چیڈل میں واقع جان لیوس اسٹور سے ڈیزائنر پرفیوم چوری کرتے ہوئے گرفتار کیا گیا تھا۔

عدالت نے اگیتا سیکا کو چار جرائم کا اعتراف کرنے پر سزا سنائی اور ایک سال کے لیے جان لیوس کے اسٹورز میں داخلے پر پابندی عائد کی۔ عدالت کے مطابق خاتون کا جرم منظم، مسلسل اور جان بوجھ کر کیا گیا، جس سے اسٹور اور عملے کو مالی و انتظامی نقصان پہنچا۔

مانچسٹر پولیس نے واضح کیا کہ یہ جرم صرف مالیت کے نقصان تک محدود نہیں بلکہ اسٹور کے عملے اور دیگر خریداروں پر بھی اثر انداز ہوتا ہے اور قیمتوں میں اضافے کا باعث بنتا ہے۔