خواتین کے مقابلے میں مردوں میں دوگنا زیادہ تعداد میں پلاسٹک سرجری کرانے کا انکشاف

عام خیال کے برعکس مردوں میں پلاسٹک سرجری یا کاسمیٹک ٹریٹمنٹس کروانے کا رجحان خواتین کے مقابلے میں دوگنا زیادہ بڑھ گیا ہے۔

ایک نئی رپورٹ کے مطابق 2018 سے 2024 کے دوران مردوں میں پلاسٹک سرجری کروانے کی شرح میں 95 فیصد اضافہ ہوا، جبکہ نان سرجیکل کاسمیٹک ٹریٹمنٹ جیسے انجیکشنز، لیزر تھراپی وغیرہ میں 116 فیصد اضافہ ریکارڈ کیا گیا۔

خواتین میں اسی عرصے میں پلاسٹک سرجری اور دیگر ٹریٹمنٹس کی شرح میں بالترتیب 59 فیصد اور 55 فیصد اضافہ ہوا۔

رپورٹ میں بتایا گیا کہ یہ رجحان خاص طور پر جوان مردوں، مشرق وسطیٰ اور لاطینی امریکا میں زیادہ نمایاں ہے، جہاں سماجی رویوں میں تبدیلی اور مردوں میں کاسمیٹک طریقہ کار اپنانے کا رجحان بڑھا ہے۔

رپورٹ کے مطابق اب بھی 84 فیصد پلاسٹک سرجری یا نان سرجیکل ٹریٹمنٹس خواتین کرواتی ہیں جبکہ 16 فیصد مرد اس میں حصہ لیتے ہیں، مگر رجحان میں اضافہ دیکھنے میں آیا ہے۔