جنوبی افریقہ میں 60 ہزار سال پرانے زہریلے تیر دریافت

جنوبی افریقہ میں ماہرین نے دنیا کے قدیم ترین زہریلے تیروں کی شناخت کر لی ہے، جن کی عمر تقریباً 60 ہزار سال بتائی جا رہی ہے۔ نیویارک پوسٹ کے مطابق یہ دریافت قدیم انسانوں کی شکار کی جدید تکنیکوں اور سائنسی فہم کی واضح مثال ہے۔

جنوبی افریقہ اور سویڈن کے سائنسدانوں پر مشتمل تحقیقاتی ٹیم نے پتھر کے زمانے سے تعلق رکھنے والے تیروں کی نوکوں پر زہریلے مادے کے آثار دریافت کیے ہیں۔ ان تیروں پر جنوبی افریقہ میں پائے جانے والے پودے ’’جفبول‘‘ کے زہر کی کیمیائی باقیات موجود تھیں، جو اب تک دریافت ہونے والا دنیا کا قدیم ترین معلوم تیر زہر قرار دیا جا رہا ہے۔

محققین کے مطابق یہ تیروں کے نمونے کوازولو ناٹل کے علاقے میں واقع امہلاتوزانا چٹانی پناہ گاہ سے حاصل کیے گئے تھے۔ تحقیق سے ظاہر ہوتا ہے کہ اس دور کے انسان نہ صرف زہریلے پودوں کی خصوصیات سے واقف تھے بلکہ انہیں شکار کے لیے مؤثر طریقے سے استعمال بھی کرتے تھے۔

ماہرین کا کہنا ہے کہ یہ دریافت انسانی ذہانت، منصوبہ بندی اور ماحول سے مطابقت کی ایک شاندار مثال ہے، جو ابتدائی انسانی تہذیب کی سائنسی صلاحیتوں کو اجاگر کرتی ہے۔