ٹی20 ورلڈکپ: بنگلادیش کی شرکت کا حتمی فیصلہ 21 جنوری کو ہوگا

کرکٹ ویب سائٹ کرک انفو کے مطابق آئی سی سی ٹی20 ورلڈکپ میں بنگلادیشی ٹیم کی شرکت سے متعلق حتمی فیصلہ 21 جنوری کو کیا جائے گا۔ یہ فیصلہ اس بات کو واضح کرے گا کہ بنگلادیش اپنے میچز بھارت میں کھیلے گا یا نہیں۔

آئی سی سی نے ڈھاکا میں ہونے والی میٹنگ میں بنگلادیش کرکٹ بورڈ (بی سی بی) کو حتمی تاریخ سے آگاہ کیا۔ ہفتے کے روز ڈھاکا میں ہونے والے اجلاس میں بنگلادیش نے بھارت نہ جانے کا مؤقف دہرایا۔

بی سی بی نے آئی سی سی کے وفد کے سامنے بھارت میں سیکیورٹی خدشات کا مؤقف پیش کیا ہے۔ بنگلادیش گروپ سی میں شامل ہے اور اس کے تمام میچز بھارت میں شیڈول ہیں، جو سیکیورٹی خدشات کی وجہ سے تنازع کا باعث بنے ہوئے ہیں۔

واضح رہے کہ بھارتی کرکٹ بورڈ نے مودی سرکار کے حکم پر بنگلادیشی بولر مستفیض الرحمان کو آئی پی ایل سے خارج کیا تھا، جس کے بعد بنگلادیش نے بھارت میں ٹی20 ورلڈکپ کھیلنے سے انکار کر دیا تھا۔

اب دیکھنا یہ ہے کہ آئی سی سی اس معاملے میں کیا فیصلہ کرتی ہے، کیونکہ یہ فیصلہ ورلڈکپ کے شیڈول اور شائقین کرکٹ کے لیے اہمیت کا حامل ہے۔