دہشت گردی کا خطرہ صرف خیبر پختونخوا نہیں، پورے پاکستان کو ہے: رانا ثناء اللہ

وزیراعظم کے مشیر رانا ثناء اللہ نے خبردار کیا ہے کہ خیبر پختونخوا میں دہشت گردی کے خطرات سورج کی طرح عیاں ہیں اور اگر اس کا بروقت اور سخت سدباب نہ کیا گیا تو یہ صرف خیبر پختونخوا ہی نہیں بلکہ پورے پاکستان کی سلامتی اور وجود کے لیے سنگین خطرہ بن سکتی ہے۔

ایک نجی ٹی وی چینل (دنیا نیوز) سے خصوصی گفتگو کرتے ہوئے رانا ثناء اللہ نے اپوزیشن کے اس موقف کو مسترد کر دیا جس میں صوبے میں ایمرجنسی یا وفاقی اقدامات سے متعلق ثبوت مانگے جا رہے تھے۔ انہوں نے سوال اٹھایا کہ جو صورتحال سب کے سامنے واضح ہو، اس کا ثبوت مانگنے کا کیا جواز ہے؟ انہوں نے کہا کہ معرکہ حق اور ہندوستانی ناکامیوں کے بعد بھارت افغانستان میں بیٹھ کر پراکسیز کا سہارا لے رہا ہے، جہاں ڈرون حملوں اور اسرائیلی تکنیکی معاونت کے ذریعے عدم استحکام پھیلانے کی کوشش کی جا رہی ہے۔

رانا ثناء اللہ کا کہنا تھا کہ خیبر پختونخوا کی صوبائی حکومت کو امن و امان کے قیام کے لیے اپنا آئینی کردار ادا کرنے کا کہا گیا تھا، مگر ان کے انکار کے بعد وفاق کو انتظام سنبھالنا پڑا۔ اب امن و امان کے خلا کو پُر کیا جائے گا اور پاکستان کی مسلح افواج و قانون نافذ کرنے والے ادارے دہشت گردوں کا مکمل قلع قمع کریں گے۔ مذاکرات سے متعلق سوال پر انہوں نے واضح کیا کہ اپوزیشن اگر بات چیت چاہتی ہے تو اسے موجودہ جمہوری نظام کا حصہ بن کر اپنا کردار ادا کرنا ہو گا۔