امریکی کسان نے 1431 کلو وزنی دیوہیکل کدو اگا لیا، عالمی ریکارڈ ٹوٹنے کا امکان

امریکی ریاست رہوڈ آئی لینڈ (Rhode Island) میں ایک کسان نے 1431 کلوگرام (تقریباً 3156 پاؤنڈ) وزنی دیوہیکل کدو (Pumpkin) اگا کر دنیا بھر کے زرعی اور سائنسی ماہرین کو حیران کر دیا ہے، جس کے بعد ایک ماہ سے بھی کم عرصے قبل قائم ہونے والا عالمی ریکارڈ ٹوٹنے کا قوی امکان پیدا ہو گیا ہے۔

غیر ملکی میڈیا رپورٹس کے مطابق رہوڈ آئی لینڈ کے شہر کووینٹری سے تعلق رکھنے والے تجربہ کار کسان رون والیس (Ron Wallace) نے اپنا یہ انتہائی وزنی کدو وارن کے علاقے میں منعقدہ ‘سدرن نیو انگلینڈ جائنٹ پمپکن ویٹ آف’ (Southern New England Giant Pumpkin Weigh-off) مقابلے میں پیش کیا۔ جب ترازو پر اس کا باقاعدہ وزن کیا گیا تو وہ 1431 کلوگرام ریکارڈ ہوا، جس سے یہ دنیا کی تاریخ میں 1361 کلوگرام (3000 پاؤنڈ) کی حد عبور کرنے والا پہلا کدو بن گیا ہے۔

اگر گینیز ورلڈ ریکارڈز (Guinness World Records) کی ٹیم اس وزن کی باضابطہ تصدیق کر دیتی ہے تو یہ نیا عالمی ریکارڈ بن جائے گا۔ اس سے قبل رواں ماہ 3 اکتوبر کو انگلینڈ کی کاؤنٹی برکشائر میں 1296 کلوگرام وزنی کدو کا ریکارڈ قائم ہوا تھا۔ واضح رہے کہ رون والیس اس سے قبل 2012 میں بھی ایک ٹن (1000 کلوگرام) سے زائد وزنی کدو اگا کر عالمی ریکارڈ اپنے نام کر چکے ہیں۔