چینی وفد کی احسن اقبال سے ملاقات، سی پیک ٹو کے تحت سرمایہ کاری، تجارتی تعاون بڑھانے پر اتفاق

وفاقی وزیر برائے منصوبہ بندی، ترقی و خصوصی اقدامات احسن اقبال سے چینی وفد نے ملاقات کی، جس میں پاک چین اقتصادی راہداری کے دوسرے مرحلے (سی پیک ٹو) کے تحت غیر ملکی سرمایہ کاری، صنعتی تعاون، دوطرفہ تجارت کے فروغ اور پاکستان کی برآمدات میں اضافے کے امور پر تفصیلی تبادلہ خیال کیا گیا۔

ملاقات کے دوران دونوں ممالک کے مابین دیرینہ اسٹریٹجک دوستی کو مضبوط تجارتی شراکت داری میں بدلنے کے عزم کا اعادہ کیا گیا، جبکہ پاکستان اور چین کے درمیان سرحدی تجارتی منڈی کے قیام کی تجویز پر بھی غور ہوا۔ وفاقی وزیر احسن اقبال نے چینی سرمایہ کاروں کو پاکستان میں پیداواری یونٹس قائم کرنے اور عالمی منڈیوں تک رسائی کے لیے پاکستان کو علاقائی برآمدی مرکز بنانے کی دعوت دی۔ انہوں نے بتایا کہ گزشتہ پانچ سالوں کے دوران سی پیک کے تحت 25 ارب ڈالر سے زائد کی سرمایہ کاری حاصل ہوئی اور بجلی کی پیداوری صلاحیت میں 8 ہزار میگاواٹ کا اضافہ ہوا۔ احسن اقبال نے امید ظاہر کی کہ آئندہ تین سال میں برآمدات میں 7 ارب ڈالر کا اضافی ہدف حاصل کر لیا جائے گا، جس کے لیے سی پیک ٹو کے تحت معدنیات، آئی ٹی، جدید ٹیکنالوجی اور صنعتی زونز کو ترجیح دی جا رہی ہے۔

چینی وفد کے نمائندے یوان جیان من نے اس موقع پر کہا کہ پاکستان میں مینوفیکچرنگ، متبادل توانائی اور آرٹیفیشل انٹیلی جنس (AI) کے شعبوں میں چینی سرمایہ کاری کے وسیع مواقع موجود ہیں۔ انہوں نے خنجراب پاس کے ذریعے سرحد پار تجارت کو فروغ دینے اور چینی منڈیوں میں پاکستانی مصنوعات کی رسائی آسان بنانے کی اہمیت پر بھی زور دیا تاکہ دونوں ممالک کے معاشی تعلقات کو مزید تقویت مل سکے۔