بھارت میں مسلم بستی کی پانی کی سپلائی بند، معاملہ اقوام متحدہ تک پہنچ گیا

بھارت کی ریاست مغربی بنگال کے دارالحکومت کولکتہ کی جیوتی نگر کالونی میں مسلمان آبادی کو پینے کے پانی سے محروم رکھنے کا المناک معاملہ اب اقوامِ متحدہ (UN) کے دربار تک پہنچ گیا ہے۔ غیر ملکی ذرائع ابلاغ کے مطابق میونسپلٹی کی جانب سے پانی کی فراہمی معطل کیے جانے کے باعث تقریباً 5 ہزار غریب مسلمان شدید مشکلات اور انسانی بحران سے دوچار ہیں۔

رپورٹ کے مطابق بھارتیہ جنتا پارٹی (بی جے پی) کی مقامی حکومت پر انتخابی انتقام کے تحت مسلم آبادی کی واٹر سپلائی بند کرنے کا سنگین الزام عائد کیا گیا ہے۔ مقامی رہائشیوں نے انکشاف کیا کہ میونسپلٹی نے مرمت کا بہانہ بنا کر رات کی تاریکی میں ان کی سپلائی لائنیں کاٹ دیں جبکہ ملحقہ ہندو اکثریت والی بستی میں پانی کی فراہمی بلا تعطل جاری ہے۔ مقامی رہائشی شدید گرمی اور ضرورت کے تحت ایک کلومیٹر دور سے آلودہ پانی لانے پر مجبور ہیں۔ مقامی حکام، حکومت اور ہائی کورٹ سے کوئی داد رسی نہ ملنے پر ترنمول کانگریس (TMC) کے رکنِ پارلیمان سمیر الاسلام نے بنیادی انسانی حقوق کی اس سنگین خلاف ورزی پر اقوامِ متحدہ سے فوری مداخلت کی اپیل کر دی ہے۔

رکنِ پارلیمان سمیر الاسلام اور کولکتہ کے سینئر صحافی سوبجیت باگجی کے مطابق بی جے پی کے نو منتخب رکنِ اسمبلی رتیش تیواری نے ووٹ نہ دینے پر کھلم کھلا انتقامی کارروائیوں کا اعلان کیا تھا۔ پینے کے پانی جیسے بنیادی حق کو سیاسی و مذہبی تعصب کی بھینٹ چڑھانا انسانی حقوق کے عالمی منشور کی کھلی خلاف ورزی ہے۔ یاد رہے کہ اس سے قبل 2022 میں بھی مدھیہ پردیش اور نئی دہلی کے مسلم اکثریتی علاقوں میں سیاسی کشیدگی کے بعد بجلی، پانی اور صفائی کے بنیادی کنکشن معطل کیے جانے کے واقعات سامنے آ چکے ہیں۔