آبنائے ہرمز میں مزید 2 تجارتی جہاز نامعلوم پروجیکٹائلز کا نشانہ بن گئے

عالمی توانائی اور بحری تجارت کے اہم ترین راستے آبنائے ہرمز (Strait of Hormuz) میں دو تجارتی جہاز نامعلوم پروجیکٹائلز (میزائل یا ڈرون حملوں) کا نشانہ بن گئے ہیں، تاہم خوش قسمتی سے دونوں جہاز شدید نقصان سے بچ گئے اور کسی قسم کا جانی نقصان نہیں ہوا۔

برطانوی بحری تجارتی ایجنسی ‘یو کے ایم ٹی او’ (UKMTO) کی جانب سے جاری کردہ الرٹ کے مطابق پہلا حملہ آبنائے ہرمز میں داخل ہونے والے 50 ہزار ٹن وزنی ایک بڑے کنٹینر بردار جہاز پر کیا گیا، جبکہ کچھ ہی دیر بعد آبنائے ہرمز سے باہر نکلنے والے 19 ہزار ٹن وزنی ایک اور تجارتی جہاز کو بھی نشانہ بنایا گیا۔

برطانوی میری ٹائم ایجنسی نے تصدیق کی ہے کہ دونوں واقعات میں جہازوں کے کچھ حصوں کو معمولی نقصان پہنچا، مگر دونوں کے عملے بالکل محفوظ رہے۔ حملوں کے باجود دونوں تجارتی جہازوں کا انجن اور نیویگیشن سسٹم فعال رہا، جس کے بعد انہوں نے اپنی منزل کی جانب سفر جاری رکھا۔ سیکیورٹی اداروں کی جانب سے واقعے کی مزید تحقیقات کی جا رہی ہیں۔